Zelensky, Trumpit: Bëni presion mbi Putinin, jo mbi mua

Presidenti Volodymyr Zelensky i bëri thirrje Uashingtonit që të ushtrojë presion më të madh mbi presidentin rus Vladimir Putin, në vend që ta bëjë këtë ndaj Ukrainës, ndërsa Moska vazhdon pushtimin e saj në shkallë të gjerë.

“Është më mirë të ushtroni presion më të fortë mbi Putinin, jo mbi mua”, citohet të ketë thënë Zelensky në një intervistë për “PBS NewsHour”, të transmetuar të hënën, më 2 nëntor.

“Nuk jam unë ai që është agresiv”, shtoi ai.

Kur gazetarja i kërkoi ta përshkruante marrëdhënien e tij me Trumpin me një fjalë të vetme, Zelensky u përgjigj: “Emocionale”.

Ai shpjegoi se Uashingtoni duhet të ndjekë një qasje më pragmatike ndaj luftës, duke u përqendruar te përgjegjësia e Rusisë për pushtimin, në vend që të kritikojë udhëheqjen e Ukrainës.

“Kush është armiku? Kush e nisi këtë luftë? Putini”, tha ai.

Zelensky gjithashtu vuri në dyshim vlerën e deklaratave favorizuese për presidentin rus dhe kritikoi argumentin se marrëveshjet energjetike me Moskën do të ulnin domosdoshmërisht çmimet e karburanteve në ShBA.

Ai theksoi se forcimi i Ukrainës është thelbësor jo vetëm për mbijetesën e saj, por edhe për sigurinë evropiane, duke paralajmëruar se një Rusi që ndihet më e fuqishme mund të kërcënojë në të ardhmen territorin e NATO-s.

“Pra, është më mirë ta forconi Ukrainën, sepse ne në fakt po mbrojmë Evropën, jo vetëm veten tonë”, tha ai.

Këto komente erdhën pasi gazetarja e pyeti Zelenskyn rreth kritikave të Trumpit ndaj udhëheqjes së tij, lehtësimit të kufizimeve ndaj Rusisë nga ana e Uashingtonit, si dhe angazhimit të fundit të administratës amerikane me Moskën.

Rruga Press