Këta akoma s’janë pajtuar me faktin që Kosova është shtet edhe pa PDK-në në pushtet
Nga Donik Sallova
Ne që e ndjekim moti politikën na kujtohet ajo periudha e pasluftës kur për të ardhur në pushtet PDK-ja pothuajse u distancua nga UÇK-ja. Thaçi e mori përsipër realizimin e projektit të Kosovës shtet multietnik, duke e devijuar nga rruga që kishin ndjekur ideologët dhe veprimtarët shqiptarë, që shtetin e Kosovës e projektuan edhe konstitucionalisht si “shtet i kombit shqiptar…” (7 shtator 1990, Kushtetuta e Kaçanikut).
Për t’u dukur sa më jo-UÇK para ndërkombëtarëve që iu premtoi të deshqiptarizonte projektin politik të shtetit të Kosovës, Thaçi i aderoi në PDK dhe në ekipin e tij figura të ashtuquajtura urbane neutrale kombëtarisht si Petrit Selimit, Berat Buzhala, Dukagjin Gorani etj. Këta e të tillë të tjerë u bënë fytyra e re jomilitare dhe jokombëtare e PDK-së që ia mundësoi Thaçit ardhjen në pushtet në vitin 2007 (sigurisht pasi SHIK-u i kishte kapur 3-4 figura kyçe në LDK të cilat mundësuan ndarjen e e saj). Thaçi e përmbysi doktrinen e “njohjes formale” të pavarësisë që proklamonte Ibrahim Rugova (pra që kërkohte njohjen e entitetit të krijuar me aktet kombëtare politike të viteve 1990) dhe e mori rolin e protagonistit në pavarësinë ahtisaariane.
Këto gjëra i kam thënë e shkruar edhe para 20 vitesh, prandaj nuk po them ndonjë gjë të re. Nën qeverisjen e Thaçit u zhduk çdo simbolikë shqiptare në identifikimin publik të Republikës së Kosovës. Ministritë e tij të arsimit me vite kanë mbështetur rishikimin e historisë si plotësim të kërkesave të ca ndërkombëtarëve për paqësimin dhe pajtimin me Serbinë, por duke e shlyer historinë se Kosova u fitua me gjak shqiptari e krimesh serbe. Aq shumë u pat distancuar qeverisja e PDK-së nga UÇK-ja sa që këto shoqatatat e luftës dukeshin gati komike kur rrallë dilnin me ndonje konferencë për shtyp. Për Thaçin i shenjtë u bë pushteti, prandaj shkoi u përkul edhe te ai lapidari serb (po e dini ju çka shkruan aty).
Prandaj sot, kur PDK bën sikur po shqetësohet për Kushtetutshmërinë dhe rendin juridik, thjeshtë më qeshet shumë, sepse partia-shtet e pasluftës, që për pushtetin pati model ideologjinë staliniste të Enver Hoxhës, shtetin e Kosovës e ka kuptuar vetëm si pushtet dhe ngaqë qëndruan 20 vite në pushtet menduan vërtet që shteti i Kosovës është pushteti i tyre. Këta akoma s’janë pajtuar me faktin që Kosova është shtet edhe pa PDK-në në pushtet.
Ne që e njohim mirë historinë e pasluftës të kësaj partie që kapi dhe shiti çdo gjë publike sa ishte në pushtet, kur i shohim sot këta çiliminjtë e PDK-së tek bërtasin “UÇK, Kushtetuta, Shteti”, na ngjajnë thjeshtë me palaço politike që mendojnë se kemi harruar çfarë i kanë bërë Kosovës.
Rruga Press