BE përdor 1.4 miliardë euro nga asetet e ngrira ruse për të mbështetur Ukrainën

Bashkimi Evropian do të përdorë 1.4 miliardë euro nga fitimet e krijuara mbi asetet e ngrira ruse për të mbështetur Ukrainën, në kuadër të përpjekjeve për përballimin e pasojave të luftës dhe forcimin e rezistencës së saj.

Fondet vijnë nga interesat e krijuara prej aseteve të Bankës Qendrore ruse, të cilat u ngrinë nga BE-ja pas nisjes së pushtimit të plotë të Ukrainës në vitin 2022.

Sipas Komisionit Evropian, këto asete kanë gjeneruar deri tani rreth 8 miliardë euro fitime të papritura. Vetë fondet ruse mbeten të paprekura, ndërsa përdoren vetëm të ardhurat e krijuara prej tyre.

Një pjesë e madhe e paketës së fundit, rreth 1.33 miliardë euro, do të përdoret për mbështetjen e kredive të dhëna Ukrainës përmes mekanizmave të G7 dhe Bashkimit Evropian.

Ndërsa rreth 70 milionë euro do të kalojnë përmes Fondit Evropian për Paqe, i cili financon ndihmën ushtarake për Ukrainën.

Komisioni Evropian ka bërë të ditur se përdorimi i këtyre të ardhurave synon të ndihmojë Ukrainën dhe të rrisë përgjegjësinë financiare të Rusisë për dëmet e shkaktuara nga lufta.

Rruga Press