BE drejt hapjes së një grupi kapitujsh negociues për Ukrainën dhe Moldavinë

Bashkimi Evropian pritet të hapë vetëm një nga grupet e mbetura të kapitujve negociues me Ukrainën dhe Moldavinë, duke zbehur pritshmëritë e presidentit ukrainas Volodymyr Zelensky, i cili kishte shpresuar që të hapeshin të pesë grupet e mbetura.

Sipas informacioneve të fundit, edhe propozimi i disa shteteve anëtare për hapjen e të paktën dy grupeve nuk ka marrë mbështetjen e nevojshme.

Në një grup pune të Këshillit të Bashkimit Evropian është arritur marrëveshja që të hapet vetëm grupi 6 i kapitujve negociues, i cili lidhet me politikën e jashtme.

Autoritetet e Ukrainës dhe Moldavisë janë njoftuar të jenë të përgatitura për zhvillimin e një konference të mundshme ndërqeveritare më 14 korrik në Bruksel, ku mund të zyrtarizohet ky hap.

Megjithatë, procesi kërkon ende përmbushjen e dy procedurave formale. Fillimisht, ambasadorët e vendeve anëtare duhet të miratojnë dërgimin e letrës përkatëse, gjë që pritet të ndodhë të mërkurën. Më pas, shtetet anëtare duhet të arrijnë një marrëveshje unanime mbi qëndrimin e përbashkët, e cila mund të finalizohet deri të dielën e ardhshme.

Rruga Press