Euronews-i qëndror: Demonstratat në Shqipëri kundër establishmentit politik!

Demonstratat janë shndërruar në një lëvizje më të gjerë kundër establishmentit politik, ku protestuesit akuzojnë si qeverinë ashtu edhe partitë opozitare se kanë dështuar të adresojnë sfidat politike dhe ekonomike të vendit, raporton Euronews qëndror.

Mijëra shqiptarë dolën në rrugë të mërkurën në mbrëmje, në ditën e dhjetë të protestave, për të kërkuar dorëheqjen e kryeministrit Edi Rama.

Protestuesit u mblodhën në Sheshin Skënderbej në Tiranë dhe marshuan drejt Parlamentit, duke brohoritur: “Rama në burg, Berisha në burg”, duke iu referuar Sali Berishës, ish-kryeministër dhe aktualisht kryetar i Partisë Demokratike të Shqipërisë.

Lëvizja e protestës, e cila nisi si kundërshtim ndaj një projekti të planifikuar turistik në zonën e Pyllit të Sodës dhe në ishullin e Sazanit, hyri të mërkurën në ditën e saj të dhjetë radhazi, duke kulmuar me atë që organizatorët e përshkruan si një demonstratë mbarëkombëtare.

Drejtuesit e protestës u bënë thirrje shqiptarëve brenda dhe jashtë vendit t’i bashkoheshin tubimit, i cili ishte planifikuar qëllimisht në përvjetorin e Lidhjes së Prizrenit, një ngjarje e shekullit XIX që konsiderohet gjerësisht si simbol i unitetit kombëtar shqiptar.

Lëvizja u nxit fillimisht nga shqetësimet për një projekt investimi të propozuar nga një sipërmarrje e lidhur me Jared Kushner, dhëndrin e presidentit amerikan Donald Trump, në një zonë të mbrojtur bregdetare. Megjithatë, ajo është shndërruar tashmë në një fushatë më të gjerë kundër një sërë politikash dhe ligjesh të qeverisë.

Gjatë protestave, pjesëmarrësit kanë paraqitur pesë kërkesa kryesore: Dorëheqjen e qeverisë; Shfuqizimin e ligjeve dhe statusit special për investitorët strategjikë;
Tërheqjen e Paketës së Maleve; Shfuqizimin e ndryshimeve në Ligjin për Zonat e Mbrojtura; Shfuqizimin e ndryshimeve në Ligjin për Trashëgiminë Kulturore.

Qeveria shqiptare argumenton se zhvillimi i planifikuar në bregdetin Adriatik do të ketë efekt transformues për vendin, ndërsa Shqipëria synon të hyjë në tregun e turizmit luksoz dhe të avancojë në procesin e anëtarësimit në Bashkimin Europian.

Projekti luksoz përbëhet nga dy pjesë: një zhvillim turistik në zonën e Lagunës së Nartës, e cila është rezervat natyror, dhe një resort më i vogël në ishullin e pabanuar të Sazanit, një ish-bazë ushtarake e periudhës komuniste.

Kryeministri Edi Rama deklaroi javën e kaluar për Euronews se kundërshtimi ndaj projektit të propozuar në jug të vendit po amplifikohet nga rrjete robotike (bots), narrativa antisemitike dhe forca të jashtme armiqësore, të cilat sipas tij po përpiqen të nxisin tensione në Shqipëri.

Të martën, një zëdhënës i Komisionit Europian u bëri thirrje autoriteteve shqiptare të veprojnë “pa vonesë”, në mënyrë që të mos rrezikojnë procesin e anëtarësimit të vendit në Bashkimin Europian, i cili kërkon përafrimin me standardet mjedisore të bllokut.

“Shqipëria duhet të përmbahet nga veprime që mund të minojnë përmbushjen e kriterit për mbylljen e kapitullit përkatës, në këtë rast Kapitullin 27, dhe për këtë arsye ne presim që autoritetet shqiptare të veprojnë pa asnjë vonesë”, deklaroi zëdhënësi Guillaume Mercier, duke iu referuar kapitullit të negociatave që lidhet me përafrimin e legjislacionit mjedisor me atë të Bashkimit Europian.

Organizatorët deklaruan se protestat do të vazhdojnë edhe në ditët në vijim, duke theksuar se kërkesat e tyre mbeten të pandryshuara.

Rruga Press