Kurti mirëpret alpinistët që synojnë ngjitjen e Kilimanxharos

Kryeministri në detyrë i Republikës së Kosovës, Albin Kurti, ka pritur sot në takim një grup alpinistësh nga Klubi Alpin “Prishtina”, të cilët po përgatiten për një ekspeditë të veçantë ndërkombëtare, ngjitjen e majës së Kilimanxharos në Afrikë.

Gjatë këtij takimi, Kurti është informuar nga përfaqësuesit e klubit për përgatitjet dhe planet për udhëtimin drejt Tanzanisë, ku alpinistët synojnë të ngjisin majën më të lartë të kontinentit afrikan, në lartësi prej 5,895 metrash, pikërisht në ditën e përvjetorit të Pavarësisë së Republikës së Kosovës.Nga ana e tyre, organizatorët kanë theksuar se ekspedita është konceptuar si një formë e përfaqësimit dhe promovimit të Kosovës në arenën ndërkombëtare, përmes sportit malor dhe aktiviteteve alpinistike.

Në përmbyllje të takimit, kryeministri Kurti i ka falënderuar alpinistët për vizitën dhe i ka përgëzuar për angazhimin e tyre në promovimin e vendit, duke u uruar fat dhe suksese në këtë ngjitje me rëndësi të veçantë simbolike.

Rruga Press