Murati: Depozitat e familjeve arrijnë rekord. Faktet rrëzojnë propagandën

Ministri në detyrë i Financave, Punës dhe Transfereve, Hekuran Murati, ka publikuar të dhëna zyrtare nga Banka Qendrore e Kosovës, duke theksuar se depozitat dhe kursimet e familjeve kosovare kanë arritur nivelin më të lartë ndonjëherë, 4.69 miliardë euro në fund të muajit tetor 2025.

Sipas Muratit, krahasuar me periudhën e njëjtë pesë vite më parë, kur depozitat ishin 2.57 miliardë euro, rritja kap shifrën prej 2.12 miliardë euro, ose 82.5%. Ai tha se kjo rritje e jashtëzakonshme dëshmon stabilitet ekonomik dhe rritje të mirëqenies së qytetarëve.

Në krahasim, gjatë pesë viteve para Qeverisë Kurti, depozitat dhe kursimet e familjeve kishin shënuar një rritje prej vetëm 745 milionë euro, apo 40.8%.

Murati u shpreh se periudha 2020–2025 ka sjellë “më shumë se dyfish rritje më të shpejtë të parave në banka” sesa qeverisjet e kaluara, duke e cilësuar këtë si një tregues të qartë se “faktet çmontojnë propagandën”.

Ministri theksoi se këto të dhëna zyrtare dëshmojnë fuqizimin ekonomik të familjeve kosovare dhe besimin e shtuar në stabilitetin financiar të vendit.

Rruga Press