Shumë mirë që ka solidarizim rreth çështjes Palestinë-Izrael, por edhe më shumë solidarizim do duhej për ngjarjet në verit të Kosovës

October 11, 2023 user 1

Shkruan Megi Mustafaraj

Shumë mirë që ka solidarizim rreth çështjes Palestinë-Izrael, ku po ndodhin masakra të tmerrshme brutale. Mirëpo jo thjesht i njëjti solidarizim, por edhe më shumë solidarizim do duhej për ngjarjet në veri të Kosovës.

Askush nuk u tha disa OJQ-ve/individëve se një ngjarje është e vlefshme vetëm nëse zhvillohet jashtë nocionit që mban emrin shqiptar. Solidarizimi është çështje ndjenje drejtësie e përhershme, jo vetëm ndjekje e një trendi momental. Për këtë lloj falciteti të gabuar dhe të dëmshëm na mjafton Rama, i cili pozicionohet vetëm nëse më parë është pozicionuar “i forti”. Secili që e prekin ngjarjet e fundit, por nuk ka thënë gjë për ngjarjet në Kosovë, duhet ta mendojë seriozisht se mos në bazë të kësaj mund të ketë racizëm të pavetëdijshëm. Më e keqja, racizëm ndaj vetvetes.

Lexo më shumë Kryeministri Kurti vendos gurthemelin e nënstacionit policor të policisë kufitare në Izvor të Zveçanit, dy kilometra nga kufiri me Serbinë

Me pak përvojë aty-këtu konstatohet lehtë se këto lloj profilesh kanë fuqi të dobët në perceptimin e gjeopolitikës, stategjisë, historisë e më tej.

Sot kur gjërat po reduktohen te një “yeah-yeah”, është më e lehtë të thuash “të drejtat e njeriut” sesa “të drejtat e kombeve”. Më pas thuhet se njeriu dhe të drejtat e tij janë universale, por nuk bëhet zë kur ashtu pa u kuptuar mirë disa përjashtohen pjesërisht apo plotësisht nga të qenit njerëz: Të gjithë njerëzit kanë të drejta, por jo të gjithë janë njerëz. Pra kujdes, ky është racizmi ku mund të bihet kollaj, të cilin thoni se e luftoni. Pra kujdes me çështjen e Kosovës, e vështirë, do ca vullnet, shumë punë, sepse trendin nuk e ka përcaktuar “i forti”, duhet ta përcaktojmë ne. Por sido që të shkojë puna, do jemi 100 përqind të sigurt që nuk jemi treguar racistë me veten.

Lexo më shumë Zyrtari i lartë i NATO-s u bën thirrje bizneseve të përgatiten për ‘skenarë lufte’

Nga ana tjetër, dyshoj se vërtet njihen aq shumë edhe ngjarjet Rusi-Ukrainë, Palestinë-Izrael, Iraku, Irani, Siria, Afganistani etj. Duhet hequr dorë nga kotësia e bujshme, për të shkuar te modestia e thjeshtë produktive, përballë çështjeve të shoqërisë, kombit, shtetit dhe raporteve të shteteve që sot janë më të çekuilibruara se kurrë.

Shtet-formimi nuk është arrirë ndonjëherë me të bërë sikur, ai vjen sepse duam, duhet dhe mundemi.

Rruga Press