Kurti: Në Bruksel, Vuçiqi tha se Radojçiqi do të bëhet Adem Jashari i serbëve

Kryeministri i Kosovës, Albin Kurti, ka zbuluar detaje nga takimi i 2 majit në Bruksel që ka pasur me presidentin e Serbisë, Aleksandar Vuçiq, dhe obsesionimin e këtij të fundit, sipas Kurtit, me komandantin legjendar të UÇK-së, Adem Jashari.

Në një shkrim në Facebook, Kurti ka shkruar se Vuçiqi i ka thënë atij se Milan Radojçiqi, i sanksionuari nga SHBA-ja, “do të bëhet Adem Jashari i serbëve”.

Kryeministri i Kosovës ka thënë se Vuçiqi dëshironte më 24 shtator ta shndërronte Manastirin e Banjskës në “Kullë të Jasharëve” për serbët e Kosovës.

“Vuçiq është i obsesionuar me kryekomandantin e UÇK-së, Adem Jasharin. Ai dëshironte që me 24 shtator ta shndërronte Manastirin Ortodoks të Banjskës në “Kullë të Jasharajve” për serbët e Kosovës! Në takimin e 2 majit në Bruksel na tha që Millan Radojçiq do të bëhet Adem Jashari i serbëve. Por, duke qenë diktator, ai s’e kupton historinë: epopeja dhe çlirimi nuk fabrikohen dhe as s’kopjohen”, ka shkruar Kurti.

Sipas tij, serbët në Kosovë kanë nevojë për çlirim nga veglat terroriste të Serbisë.

“Kosova është shtet demokratik dhe vend properëndimor: kush integrohet, jeton më mirë. Serbët në Kosovë nuk kanë nevojë për çlirim nga Republika e Kosovës por nga veglat terroriste të Serbisë”, ka shkruar Kurti.

Rruga Press