Sveçla pas lirimit të policëve: Serbia vazhdon me lojërat e saj

Ministri i Punëve të Brendshme të Kosovës, Xhelal Sveçla pas lirimit të policëve ka thënë se Serbia vazhdon me lojërat e saj.

Ai në një postim në Facebook ka shkruar se policët sot kthehen në Republikën e Kosovës, në familjet e tyre e në radhët e Policisë së Kosovës.

Ka shtuar se ata do të bashkohen me kolegët e tyre në misionin e përbashkët për rend e ligj, siguri e sovranitet në tërë territorin e Republikës së Kosovës.

“Ndonëse lirimi i tyre sot është lajm i mirë, përndjekja e tyre nga Serbia do të vazhdojë në liri. Konfirmimi i aktakuzës dhe lirimi në procedurë të rregullt është vazhdim i orvatjeve të Serbisë për të mbuluar agresionin policoro-ushtarak brenda territorit të Republikës së Kosovës”, ka shkruar ai.

Ka shtuar se policët kanë qenë në detyrë zyrtare, brenda territorit të Republikës dhe duke kryer detyrën e tyre në mbrojtje të integritetit, sovranitetit të vendit dhe luftim të kontrabandës.

Sipas tij, ata duhet të lirohen pa kushte dhe Serbia duhet të mbahet përgjegjëse për cenimin e integritetit territorial të Republikës së Kosovës.

Ministrja e Punëve të Jashtme, Donika Gëralla, i ka falënderuar vendet aleatë pas lirimit të policiëve, që u rrëmbyen javë më parë nga autoritetet serbe. Ajo shkroi në Twitter se policët po i shërbenin me zell rendit dhe ligjit në betejën kundër krimit të organizuar “kur u rrëmbyen nga regjimi i Vuçiqit”.

“Ata po i shërbenin me zell rendit dhe ligjit në betejën tonë kundër krimit të organizuar kur u rrëmbyen nga regjimi i Vuçiqit. Falënderojmë të gjithë aleatët tanë për sigurimin e lirisë së tyre”, shkroi ministrja.

Rruga Press