Për situatën në Bakhmut, kreu i ushtrisë ukrainase konsultohet me udhëheqësit ushtarakë të NATO-s

Udhëheqësi më i lartë ushtarak i Ukrainës, gjenerali Valery Zaluzhnyi, diskutoi situatën në Bakhmut me udhëheqësit ushtarakë të SHBA-së dhe NATO-s, tha ai në një postim në Telegram të martën.

“Së pari i njoha me situatën në fushëbetejë. U fokusova më në detaje në drejtimin lindor. Konkretisht, situatën në Bakhmut”, tha Komandanti Suprem i Ukrainës.

“Diskutuam për dërgimin e ndihmës ushtarake, përfshirë armët dhe artilerinë. Çështjet e forcimit të mbrojtjes kundërajrore dhe furnizimit me armë me rreze të gjatë mbeten vendimtare”, shtoi ushtaraku ukrainas.

Në takim morën pjesë Komandanti Suprem i Forcave Aleate për Evropë dhe Komandanti i Komandës Evropiane të SHBA-së, gjeneral Christopher G. Cavoli, shefi i Shtabit të Mbrojtjes së Britanisë së Madhe, Admirali Sir Anthony Radakin, Shefi i Shtabit të Përgjithshëm të Forcave të Armatosura polake, gjenerali Rajmund Andrzejczak dhe Komandanti i Grupit të Ndihmës për Sigurinë SHBA-Ukrainë, Antonio Aguto.

Më herët në media u shfaq informacioni se kishte një mosmarrëveshje midis presidentit të Ukrainës Volodymyr Zelensky dhe komandës ushtarake ukrainase, në lidhje me mbrojtjen e Bakhmutit.

Me sa duket, Zelensky këmbënguli të mbronte Bakhmutin pavarësisht këshillave të komandës ushtarake.

Të hënën u lëshua një komunikatë nga Ukraina, në të cilën thuhej se liderët politikë dhe ushtarakë janë unanim në mendimin e tyre se Bakhmuti duhet të mbrohet.

Presidenti Zelensky tha të martën se rënia e Bakhmutit do t’i hapte rrugën Rusisë për të avancuar në pjesën e lirë të rajonit të Donetskut, drejt qyteteve të tilla si Kramatorsk.

Rruga Press