BE arrin marrëveshje me Azerbajxhanin për të dyfishuar importet e gazit – Putini pranon problemet e teknologjisë

Komisioni Evropian ka nënshkruar një marrëveshje me Azerbajxhanin për të dyfishuar importet e gazit natyror azerbajxhanas në të paktën 20 miliardë metra kub në vit deri në vitin 2027.

“Sot, me këtë Memorandum të ri Mirëkuptimi, ne po hapim një kapitull të ri në bashkëpunimin tonë energjetik me Azerbajxhanin, një partner kyç në përpjekjet tona për t’u larguar nga karburantet fosile ruse”, ka thënë Ursula von der Leyen.

Ndryshe, BE-ja po kërkon furnizues alternativë pas fillimit të agresionit rus në Ukrainë.

Siç është thënë më tej, Azerbajxhani tashmë po rrit dërgesat e gazit natyror në BE nga 8.1 miliardë metra kub (bcm) në 2021 në 12 miliardë metra kub në 2022.

Ndërkohë presidenti rus Vladimir Putin ka thënë se do të jetë e pamundur që Rusi “të shkëputet” nga pjesa tjetër e botës dhe se vendi duhet të fokusohet në zhvillimin e teknologjisë së tij dhe mbështetjen e kompanive me rritje të shpejtë.

“Është e qartë, ne nuk mund të zhvillohemi të izoluar nga pjesa tjetër e botës. Në botën e sotme, ju nuk mund të ‘rrethoni’ gjithçka me një kompas dhe të vendosni një gardh të madh, thjesht nuk është e mundur”, citohet të ketë thënë Putin gjatë një video-konference me zyrtarë qeveritarë.

Udhëheqësi rus tha gjithashtu se Moska do të kapërcejë problemet “kolosale” të teknologjisë me të cilat po përballet vendi i tij si rezultat i sanksioneve gjithëpërfshirëse perëndimore për luftën në Ukrainë.

“Kjo është një sfidë e madhe për vendin tonë”, tha Putin. “Duke kuptuar sasinë kolosale të vështirësive me të cilat po përballemi, ne do të kërkojmë zgjidhje të reja në një mënyrë energjike dhe kompetente”. 

Rruga Press