Përçarje në BE mbi ndërhyrjet në tregun e energjisë

Çështja e rritjes së çmimeve të energjisë dhe nëse blloku 27-anëtarësh duhet të ndërhyjë për të mbrojtur ekonomitë evropiane do të zënë pjesën dërrmuese të takimit të liderëve të BE-së, që mbahet këtë javë në Bruksel.

Kryeministri spanjoll Pedro Sanchez ka zhvilluar një tur kryeqytetesh, duke shpalosur propozimet e tij për vendosjen e kufijve të çmimeve dhe shkëputjen e çmimeve në rritje të gazit nga ato të elektricitetit.

Ai arriti të bindte homologët në shtetet jugore të Evropës si Italia, Greqia, Portugalia, por edhe Belgjikën dhe disa vende lindore.

“Çmimet e tregut në këto momente nuk reflektojnë realitetin. Rrjedhimisht, na duhet të marrim masa në nivel evropian si nga këndvështrimi i furnizimit, ashtu edhe nga ai i formimit të çmimit për të mbrojtur qytetarët tanë dhe industrinë tonë”, tha Sanchez.

Por vende si Gjermania dhe Holanda nuk e mbështesin ndërhyrjen në tregun e energjisë. Ndërkohë, Komisioni Evropian do të përpiqet të sigurojë që rezervat me gaz të jenë të mbushura në të paktën 90% për dimrin e ardhshëm, për t’u përballur me një ndërprerje të mundshme të furnizimit. Megjithatë, dikush është i hapur për ide.

“Na duhet të gjejmë zgjidhjet më të mira për këtë problem. Synimi ynë është të punojmë mbi opsionet më të mira në dispozicion të krerëve të shteteve, sepse çdo opsion ka mbështetjen dhe kundërshtimet e tij. Ndaj duhet të finalizojmë propozimet tona në mënyrë që bisedimet e liderëve të jenë të strukturuara”, u shpreh Maros Sefcovic, zëvendës president i KE-së.

Për Brukselin, qëllimi është të reduktojë importet me gazin rus me 2/3 deri në 2023-shin dhe të çlirohet prej tij në 2027-n.

Rruga Press