Presidentja Osmani pritet nga krerët më të lartë shtetërorë të Maltës

Presidentja e Kosovës, Vjosa Osmani, është pritur të mërkurën në takime të ndara nga presidenti i Maltës, George Vella, kryeparlamentari, Angelo Farrugia dhe ministri i Jashtëm, Evarist Bartolo.

Osmani gjatë takimit me Vellan, e ka falënderuar për mbështetjen e vazhdueshme për Kosovën dhe të ardhmen e saj në BE.

Presidentja Osmani e ka cilësuar të nevojshëm pranimin e Kosovës në BE, si një parakusht për paqe e stabilitet në Evropë.

Në këtë takim, Presidentja Osmani ka kërkuar që Malta ta mbështesë edhe më tej Kosovën në procesin e anëtarësimit në organizatat ndërkombëtare.

Ndërkaq, gjatë takimit me Farrugian, Osmani ka theksuar se në kuadër të diplomacisë parlamentare e pret ndihmën e tij dhe të parlamentit të Maltës në mënyrë që edhe Kosova të arrijë të përfaqësohet në organizata ndërkombëtare.

Ndërkohë, në takimin me ministrin e punëve të Jashtme të Maltës, Evarist Bartolo, u bë e qartë se mbështetja e tij dhe e Maltës në procesin e anëtarësimit në BE si dhe në organizata të tjera ndërkombëtare nuk ka munguar deri tani dhe është kërkuar që kjo përkrahje të vazhdojë edhe më tutje.

Rruga Press