Zgjedhjet në veri, ministri Sveçla: Nesër mundësi që qytetarët përmes votës të çlirohen nga grupet e Vuçiqit
Ministri i Punëve të Brendshme të Kosovës, Xhelal Sveçla, ka thënë se qytetarët e komunitetit serb janë duke u përballur me kërcënime e presion nga strukturat ilegale e kriminale të dirigjuara nga Beogradi.
Ministri ka pohuar se Serbia po vijon me përndjekje e arrestime të serbëve pasi u bëri presion atyre të dorëhiqen nga institucionet e Kosovës.
Ai ka shtuar se sa i përket zgjedhjeve në veri, shumë kandidatë janë dorëhequr për shkak të presioneve e sulmeve të shumta.
“Qytetarët tanë të komunitetit serb vazhdojnë të ballafaqohen me kërcënime e presion nga strukturat ilegale e kriminale të dirigjuara nga Beogradi.
Serbia po vijon me përndjekje e arrestime të serbëve të cilët akuzohen se janë angazhuar në institucionet tona. Pasi nën presion i’u kanë kërkuar dorëheqjet nga institucionet tona, tani edhe i ndëshkojnë përmes arrestimeve e i kërcënojnë përmes formave të ndryshme.
Qëllimet e Serbisë për destabilizimin e vendit tonë më së shumti kanë rënduar mbi qytetarët e komunitetit serb të cilët në vazhdimësi janë përdorur si mjet për arritjen e qëllimeve të tyre. Ata janë kërcënuar në vazhdimësi, janë sulmuar, veturat dhe pronat e tyre janë djegur sapo i kanë dorëzuar targat ilegale të Serbisë, bizneset e tyre janë shkatërruar çdoherë që pronarët nuk kanë pranuar të jenë pjesë e lojërave të tyre. Zërat ndryshe janë ndalur padrejtësisht e me orë të tëra nga policia dhe shërbimi sekret i Serbisë ndërsa tani kur jemi në proces zgjedhor, shumë kandidatë janë penguar e janë dorëhequr përshkak të presioneve e sulmeve të shumta.
Nesër do të mbahet procesi zgjedhor në 4 komunat veriore dhe përkundër frikës dhe pasigurisë që tentojnë të përhapin qarqe të caktuara e të orkestruara, ju bëj thirrje qytetarëve që të marrin pjesë në votim. Nesër është mundësia që përmes votës së qytetarëve, grupet që kanë udhëhequr nën dirigjimin e Vuçiq të marrin përgjigjen e merituar dhe qytetarët të çlirohen përfundimisht nga ta.”, ka thënë ministri Sveçla.
Zgjedhjet në katër komunat veriore në Kosovë do të mbahen nesër, ndërsa KQZ-ja ka njoftuar se tashmë ka përfunduar të gjitha përgatitjet.
Rruga Press