Zëvëndëskryeministri Bislimi: Jemi në rrugën e duhur drejt Bashkimit Evropian

Zëvendëskryeministri i Kosovës Besnik Bislimi është treguar optimist për rrugën e Kosovës drejt Bashkimin Evropian, duke vlerësuar se “janë në rrugë të duhur”.

Në seminarin Rose Roth, Bislimi u shpreh optimist për mbështetjen e shteteve anëtare për kërkesën e Kosovës për anëtarësim në Këshillin e Evropës.

“Jemi në rrugë të drejt në drejtim të BE-së, ku jo vetëm drejtimi që është i duhur por edhe shpejtësia është rritur. Kemi paraqitur synimin për Këshillin e Evropës dhe shpresojmë që do të marrim një vendim pozitiv nga Këshilli, janë 3 grupe shtetesh që do të votonin në favor, pra këto janë shtete që e kanë njohur Kosovën. Për nga perspektiva jonë duhet të ketë një konsensus mes shteteve anëtare të KE për sukses” – tha ai.

Bislimi u shpreh optimist për takimin që pritet të mbahet të enjten nga grupi punues i Këshillit Evropian, për çështjen e liberalizimit të vizave.

“Pritet që takimi i parë i grupit për vizat të jetë më 13 tetor, kur të përfundoj ky proces do të mbeten vetëm formalitete që kosovarët të lëvizin pa viza. Synimi i radhës është aplikimi për anëtarësim në BE, ne do të tentojmë ta dorëzojmë aplikacionin në fund të këtij viti. Kosova është në vitin e 6-të të implementimit të MSA-së por ende nuk e gëzon statusin e anëtarit, Serbia ka aplikuar edhe para se të nënshkruante marrëveshjen e MSA-së” – tha Bislimi.

Sipas tij Kosova meriton të jetë pjesë e mekanizmave evropian edhe për faktin se në kuadër të dialogut Kosovë-Serbi në Bruksel, ka pasur rol konstruktiv.

“Një element tjetër është qasja konstruktive në dialogun Kosovë-Serbi. Më 18 gusht kishim takimin e fundit në Bruksel dhe agjenda ka qenë normalizimi i marrëdhënieve, në këtë takim pala tjetër nuk tregoi vullnet për të marrë pjesë në këtë pikë të agjendës” – theksoi ai.

Seminari i 102-të Rose-Roth organizohet në bashkëpunim me Kuvendin e Kosovës, nën udhëheqjen e kryetarit të Delegacionit të Kuvendit të Kosovës në AP të NATO-s, deputetit Driton Hyseni, si dhe me përkrahjen e Qeverisë zvicerane e të Qendrës së Gjenevës për Qeverisje të Sektorit të Sigurisë (DCAF), së bashku me Komisionin për Ekonomi dhe Siguri.

Qëllimi kryesor i Seminareve Rose-Roth është lehtësimi i dialogut që lidhet me çështjet e sigurisë rajonale, në mesin e ligjvënësve të NATO-s dhe vendeve partnere.

Rruga Press