Wagner ende përdor Facebook-un për të rekrutuar luftëtarë, pavarësisht se Meta tha se përmbajtje të tilla do të hiqen

Në fund të majit, Meta tha se e kishte etiketuar Wagnerin si një “organizatë të rrezikshme”, duke thënë se përmbajtja që promovon grupin do të hiqet nga platformat e tij.

Por një studim i fundit zbuloi se “ata janë ende aty”, shkruan Euronews.

Wagner, grupi i dhunshëm mercenar i Rusisë i akuzuar për krime të tmerrshme dhe shkelje të të drejtave të njeriut në të gjithë botën në vitet e fundit, është ende duke përdorur Facebook dhe Instagram për të rekrutuar njerëz në internet, pavarësisht faktit se përmbajtja e tij shkel politikat e Meta-s.

Një studim i ri nga Instituti për Dialog Strategjik (ISD), një organizatë jofitimprurëse e pavarur me bazë në Londër që hulumton dhe monitoron ekstremizmin dhe dezinformimin në mbarë botën, zbuloi se Meta ka dështuar të heqë përmbajtjen që “lavdëron” Wagner dhe që përmban informacione rekrutimi për grupin, pavarësisht etiketimit të tyre si një “organizatë e rrezikshme”.

Sipas politikave të vetë Meta-s, kompania nuk lejon që asnjë organizatë apo individë të rrezikshëm “që shpallin një mision të dhunshëm ose janë të përfshirë në dhunë të kenë prani në Facebook. Ne i vlerësojmë këto subjekte bazuar në sjelljen e tyre si në internet ashtu edhe jashtë – më e rëndësishmja, lidhjet e tyre me dhunën”.

Në fund të majit, Meta konfirmoi për Politico se e kishte identifikuar Wagnerin si një organizatë të rrezikshme, pasi platformat e saj të mediave sociale u zbuluan se përdoreshin për të rekrutuar “gjak të freskët” për grupin e dhunshëm mercenar të Rusisë.

Por problemi ka vazhduar, pavarësisht politikave dhe deklaratave të vetë Meta-s.

Kështu, siç vë në pah Euronews, organizata gjeti gjithsej 114 llogari në Facebook dhe Instagram që lavdëronin Wagnerin ose postonin përmbajtje rekrutimi për grupin mercenar.

Ato janë në të paktën 13 gjuhë, duke përfshirë anglisht, frëngjisht, gjermanisht, italisht, spanjisht, portugalisht, arabisht,….

Përveç postimit të përmbajtjeve të lidhura me Wagner, llogaritë ndanë gjithashtu propagandë pro-Kremlinit.

Rruga Press