Vihet guri themeltar për banim të përballueshëm në Istog, Kurti ndan detaje nga investimi

Sot në Istog u vendos guri themeltar për ndërtimin e banimit të përballueshëm dhe social.

Në ceremoni morën pjesë kryeministri në detyrë, Albin Kurti, si dhe ministri në detyrë i Mjedisit, Planifikimit Hapësinor dhe Infrastrukturës, Liburn Aliu.

Ceremonia filloi në ora nëntë, teksa pjesëmarrës ishte kabineti i komunës në krye me kryetarin Ilir Ferati, shumë punëtorë dhe qytetarë të Istogut.

Përpara tyre, Kurti tha se ky është një projekt tejet i rëndësishëm.

“Qysh në fillim të mandatit tonë e patëm miratuar agjendën qeveritare për banim të përballueshëm dhe social, bazuar në tri parime themelore. Banimi është e drejtë themelore e njeriut. Për jetesë, nevojitet banesë! Me këtë rast, në janar të vitit 2024, Ministria ka hapur thirrjen për komunat, për ndërtimin e njësive banesore për banim të përballueshëm dhe social” u shpreh Kurti.

Ai thotë se do të ketë 4 tipe të banesave, teksa kriteret që duhet plotësuar nga të interesuarit është të mos e kenë problem banimin kolektiv.

“Këtu në Istog, vlera e punimeve është përafërsisht 4 milionë e 90 mijë, punimet do të kryhen për 3 vjet”, tha Kurti.

Rruga Press