Vihet gur themeli i shkollës “Nuhi Gashi” në Bradash të Podujevës, Kurti: Lajm i mirë për arsimin

I është vënë sot gur themeli shkollës së re “Nuhi Gashi” në Bradash të Podujevës.  E të pranishëm në vendosjen e gur themelit të kësaj shkolle ishin kryeministri në detyrë i Republikës së Kosovës, Albin Kurti, së bashku me ministren në detyrë të Arsimit, Shkencës, Teknologjisë dhe Inovacionit, Arbërie Nagavci dhe kryetarin e Komunës së Podujevës, Shpejtim Bulliqi.

Kryeministri në detyrë Albin Kurti tha se ndërtimi i objektit të ri shkollor përbën një lajm të mirë për arsimin, për Bradashin, për Podujevën dhe për të gjithë prindërit, të cilët do t’i sjellin fëmijët e tyre në shkollën “Nuhi Gashi”.  Ai falënderoi komunën për investimin dhe fshatin, i cili ka kontribuuar, është interesuar dhe angazhuar që të arrijnë te vendosja e gur themelit të shkollës së re.

“Ky është lajm i mirë për arsimin, për Bradashin, për Podujevën dhe për të gjithë prindërit të cilët do t’i sjellin fëmijët e tyre në shkollën “Nuhi Gashi”, në shkollën e cila e mbanë emrin e një mësuesi të devotshëm e bashkëluftëtarit të Shaban Polluzhës. Unë falënderoj komunën dhe  fshatin, sepse i gjithë investimi është i Komunës së Podujevës, e fshati është ai i cili ka kontribuuar, është interesuar dhe është angazhuar që të vijmë te kjo ditë e vendosjes së gur themelit. Punimet do të kryhen për maksimum dy vjet, e me kryetarin do të përpiqemi që të jenë edhe më shpejt se aq”, ka thëbnë Kurti.

Ministrja e Arsimit, Shkencës, Teknologjisë dhe Inovacionit, Arbërie Nagavci, u shpreh se në Komunën e Podujevës gjatë këtyre vjetëve ka pasur një investim të jashtëzakonshëm në përmirësimin e infrastrukturës shkollore. Ajo tha se vetëm nga Ministria e Arsimit janë investuar më shumë se 8.5 milionë euro, janë ndërtuar pesë shkolla e tri çerdhe, teksa theksoi rëndësinë që krahas infrastrukturës moderne që po mundësohet nga ana e qeverisë e ministrisë edhe mësimdhënësit të japin më të mirën e tyre që të kemi rezultate sa më të mira të nxënësve.

Ndërkaq, kryetari i Komunës së Podujevës, Shpejtim Bulliqi, tha se ky është objekti i nëntë shkollorë në këto pesë vjet të qeverisjes dhe se po punohet bashkë edhe me qeverinë dhe Ministrinë e Arsimit që çdo ditë e më shumë të krijohen kushte sa më të mira për nxënësit tanë.

Ndryshe, objekti i ri i shkollës, që mban emrin e mësuesit të devotshëm Nuhi Gashi, i cili qe bashkëluftëtar i Shaban Polluzhës, do ketë një hapësirë prej 1,330 m² brenda së cilës nëntë klasa mësimi dhe një sallë të arsimtarëve, dhoma të veçanta për kabinetet e shkencave natyrore dhe shoqërore, hapësira të nevojshme për administratë dhe tualete sipas standardeve bashkëkohore,  përfshirë edhe ato për fëmijët me nevoja të veçanta. Ky është një investim i Komunës së Podujevës në vlerë prej 624,249.74 euro. Punimet pritet të kryhen brenda dy vjetëve. 

Rruga Press