Vigan Qorolli thotë se opozita po i druhet ligjit për pasurinë e paligjshme

Deputeti Vigan Qorolli nga Lëvizja Vetëvendosje ka reaguar pasi opozita nuk e mbështeti futjen në rend dite të Projektligjit për Byronë për Pasurinë e Paligjshme.

Në deklaratën e tij, Qorolli theksoi se refuzimi i opozitës përbën, sipas tij, “një rrëfim më vete”, duke e lidhur atë me frikën nga hetimi i pasurisë së pajustifikuar. Ai shtoi se ligji synon transparencë të plotë për burimin e pasurisë, duke nënvizuar se qytetarët që e kanë fituar atë ndershëm nuk kanë arsye për shqetësim.

“Byroja është frikë vetëm për pasurinë pa adresë, për milionat pa burim, për vilat pa pagë dhe për luksin që nuk shpjegohet dot ligjërisht,” deklaroi ai.

Qorolli u shpreh i bindur se, pavarësisht kundërshtimeve, ligji do të miratohet dhe do të sjellë rritje të llogaridhënies në vend.

Rruga Press