Video/ Simulimi në rast të fatkeqësisë, radioaktiviteti nga reaktori në Zaporozhia do të mbërrinte deri në Ballkan

Në Ukrainë po zhvillohen shumë fronte të luftës, por definitivisht pika më e ndjeshme tash për tash është në Zaporozhia.

Aty, rusët po mbajnë nën kontroll centralin bëërthamor, që është reaktori më i madh në Evropë dhe Ukraina nuk e përjashton mundësinë e ndonjë fatkeqësie për shkak të sulmeve me armë mbi të.

Shkencëtarët nga Instituti Hidrometeorologjik i Ukrainës simuluan përhapjen e rrezatimit në rast të një fatkeqësie bërthamore në termocentralin Zaporizhia.

Ata zbuluan se në rast të kushteve të motit si në ditët e mëparshme, materiali radioaktiv mund të arrinte deri në veri të Detit Baltik dhe gjatë rrugës “të fluturonte” mbi Bjellorusi, Estoni, Letoni, Lituani e Poloni. Në perëndim, do të arrinte në Moldavi, Rumani, Serbi, Sllovaki, Hungari dhe Republikën Çeke, shkruan “The Guardian”.

Të njëjtën gjë pretendon edhe Rusia, e cila ka paralajmëruar se mund të mbyllë termocentralin bërthamor të Zaporizhia nëse Ukraina, sipas saj, vazhdon të bombardojë centralin.

Kreu i forcave ruse për mbrojtjen radioaktive, kimike dhe biologjike tha se sistemet ndihmëse për mirëmbajtjen e termocentralit janë dëmtuar nga sulmet e mëparshme. Ai shtoi se në rast aksidenti, materiali radioaktiv do të mbulonte Poloninë, Gjermaninë dhe Sllovakinë.

Termocentrali bërthamor, i pushtuar nga rusët, por i operuar nga personeli ukrainas, ka qenë kohët e fundit skena e bombardimeve të shpeshta, ku të dyja palët akuzojnë njëra-tjetrën për sulme. /index

Rruga Press