(Video) Ngrihen kundër resortit në Mezhgoran/ Banorët e fshtatit në Tepelenë ngrejnë dyshime te Mero Baze dhe Tërmet Peçi
Në 3 ditët e fundit banorët e fshatit Mezhgoran, Tepelenë janë përballur me një dhunë policore të pajustifikueshme për një çështje të paligjshme dhe tepër dëmtuese për komunitetin.
Banorët kërkojnë rrugë, bashkia u ofron një ujë-vjedhës dhe dhunë policore.
Bëhet fjalë për një tender që sipas burimeve kushton 900 mijë euro dhe afati i punimeve ka qenë 4 muaj, por i cili duhej zhvilluar në vitin 2021. Si pasojë e kundërshtimeve nga komuniteti “ujësjellesi” nuk është ndërtuar, por këtë herë bashkia është rikthyer sërish duke përdorur dhunën policore si mjet për të shkatërruar burimin e vetëm ujor të fshatit.
Në këtë situatë janë të implikuar kryetari i Bashkisë Tepelenë z. Tërmet Peçi dhe Mero Baze të cilët mesa duket duan të ndërtojnë një resort në afërsi të fshatit Mezhgoran por duke vjedhur resurset e pakta që ky komunitet ka.
Ata i kanë dërguar edhe një letër Kryeministrit Edi Rama, por deri tani nuk kanë pasur asnjë përgjigje. Letra e plotë më poshtë:
I nderuar Kryeministër i Shqipërisë, Z. Edi Rama,
Po ju parashtroj një problematikë vërtet shqetësuese dhe me rëndësi të veçantë për të gjithë banorët e fshatit Mezhgoran të bashkisë Tepelenë.
Para zgjedhje të 25 prillit të vitit 2021 Bashkia Tepelenë na njoftoi se në fshatin tonë do të ndërtohej një ujësjellës. Ky lajm ishte i çuditshëm për ne sepse kemi shumë vite që e kemi rregullluar furnizimin me ujë dhe asnjëherë nuk ishte kërkuar prej nesh të ndërtohej diçka e tillë. Asokohe ne komunikuam me Bashkinë Tepelenë dhe shprehimisht u dakordësuam se ky projekt nuk do të ndërtohej.
Së fundmi, rreth 10 muaj më pas kësaj marrëveshjeje sërish jemi njoftuar nga Bashkia për ndërtimin e ujësjellësit në fjalë. Kjo situatë është vërtet një ndodhi e pazakontë dhe gati në kufijtë e qesharakes por neve na shqetëson së tepërmi sepse përfshin një aset jetik për komunitetin që jeton në këtë zonë.
Burimi i vetëm ujor nga ku fshati furnizohet, në të shkuarën ka qenë problematik dhe jo i qëndrueshëm duke shkaktuar vështirësi të vazhdueshme për neve si banorë, derisa arritëm ta stabilizojmë dhe ta kthejmë në një burim funksional. Duke ditur këtë fakt është shqetësuese çdo ndërhyrje që mund të ndërmerret sepse rrezikon të shterojë burimin e vetëm ujor që kemi.
Përpos kësaj, dëmtohet dhe buxheti i shtetit sepse fondi i projektit po shpenzohet në mënyrë të padobishme, sidomos nëse burimi shteron atëherë do duhet një fond tjetër për të riparuar dëmin e për të gjetur një zgjidhje.
Këmbëngulja kaq e madhe për të zbatuar këtë projekt absurd, si dhe mungesë e transparencës me të cilën po veprohet na bën të dyshojmë se ka palë të treta të përfshira që përfitojnë nga ky projekt, prandaj ju njoftojmë të merrni masat e nevojshme për zgjidhjen e kësaj çështjeje para se të jetë tepër vonë.
Kërkesa jonë e qartë drejtuar Bashkisë Tepelenë, për të cilën po ju vëmë në dijeni dhe juve, është që ky ujësjellës mos të ndërtohet.
Fondi i ujësjellësit fare mirë mund të përdoret për ndërtimin e rrugës të fshatit e cila është në gjendje të keqe dhe ndërtimi i saj ka qenë një nevojë e përhershme të cilën ja kemi komunikuar autoriteteve të shtetit sa herë kemi pasur mundësi.
Besimplotë në një përgjigjie pozitive,
Me respekt,
Banorët e fshatit Mezhgoran, Tepelenë
Rruga Press