(VIDEO) Kapen fletë votimi false në një lokal në Elbasan

Nga selia e Partisë Demokratike janë transmetuar pamje që pretendojnë të provojnë një tjetër skemë të manipulimit të votës në zgjedhjet e 11 majit. Në një deklaratë për mediat, kreu i PD-së, Sali Berisha, akuzoi drejtëpërdrejt Partinë Socialiste për ngritjen e një “qendre alternative votimi” në fshatin Pekisht të Elbasanit, ku, sipas tij, janë kapur materiale zgjedhore dhe shuma të konsiderueshme parash në një bar-kafe në pronësi të kryeplakut të fshatit, Dervish Beqiri.

“Treni bullgar mbeti në stacionin e Pekishtit. Doli nga shinat dhe mbeti aty,” u shpreh Berisha, duke përdorur metaforën tashmë të njohur për skemën e votimit të manipuluar përmes votuesve të kontrolluar dhe votave të paracaktuara jashtë qendrave zyrtare të votimit.

Sipas kreut të opozitës, informacioni për këtë rast i është përcjellë mbrëmjen e djeshme deputetit të sapozgjedhur të Elbasanit, Blendi Himci, i cili në orët e para të mëngjesit të sotëm ka ndërhyrë në ambientet e lokalit dhe ka gjetur aty “fletë votimi, lista votuesish dhe narkoeuro”, duke lënë të kuptohet se bëhet fjalë për një skemë ku blerja e votës lidhet drejtpërdrejt me financime të paligjshme.

https://www.facebook.com/share/v/1YzsrgChuZ

“Siç keni parë ju në rastin e Kasharit, Astritit dhe në raste të tjera, ku paralel me qendrat e votimit ishin ngritur zonat e trenit bullgar nga patronazhistët. Kjo ishte një praktikë shumë e përhapur,” theksoi Berisha, duke e lidhur rastin e fundit me një zinxhir denoncimesh të mëparshme që kanë akuzuar PS-në për ngritjen e qendrave të votimit të kontrolluar nga njerëzit e saj.

Pamjet e publikuara nga PD tregojnë fletë votimi, lista me emra dhe materiale që përputhen me dokumentet zgjedhore zyrtare, ndërsa deri më tani nuk ka një reagim nga Policia e Shtetit apo Komisioni Qendror i Zgjedhjeve për të sqaruar autenticitetin apo shkeljen që mund të përbëjnë.

Rruga Press