Vermoshi në errësirë, rrugët e bllokuara nga bora mbajnë peng shkollat dhe turizmin

Vermoshi është një nga zonat turistike të vendit që do ta kishte zili çdo shtet i Evropës, por për ne është e pamundur ta vizitojmë gjatë stinës së dimrit. Prej 19 ditësh kjo zonë vuan prej mungesës së energjisë elektrike, ndërsa turistët e kanë të pamundur të vijnë në drejtim të kësaj zone turistike për shkak të bllokimit të herëpashershëm të rrugëve si pasojë e mospastrimit nga autoritetet vendore.

Rruga në drejtim të Vermoshit, pasi kalon “Gropat e Selcës” bëhet e pakalueshme për mjetet e vogla për shkak të akullit. Lehtësisht vërehet se askush nuk ka hedhur kripë apo skorje, ndonëse është një rrugë ndërkombëtare që lidh Shqipërinë me Malin e Zi.

Jozef Bushaj është nxënës në shkollën e Vermoshit. Shtëpia e tij është rreth 1 orë larg nga shkolla dhe shpesh herë si pasojë e bllokimit të rrugëve, tregon se e ka të pamundur të marrë pjesë në mësim. Termometri shënon -11 gradë.

Pjetër Lucaj është mësues në shkollën e Vermoshit. Në dimër Pjetri thotë se është vështirë për të gjithë, ndonëse fëmijëve nuk u mungon dëshira për t’u arsimuar.

Banorët thonë se Vermoshi është lënë shumë pas dore, çka po sjell edhe shpopullimin e kësaj zone. Malësorë mbajnë shpresat te turizmi, si e vetmja e ardhur, por në mungesë të rrugës dhe energjisë elektrike, askush nuk vjen në Kelmend.

Rrejti elektrik në këtë zonë lë shumë për të dëshiruar. Mjafton një erë e lehtë të fryjë dhe menjëherë ndërpritet energjia, thonë banorët.

Pamja e Kelmendit në stinën e dimrit është magjike, ndërsa peizazhet e “pikturuar” nga natyra janë mbresëlënëse. Por bora në këto zona vazhdon të jetë bukuria vrastare e poemave Migjeniane dhe askush nuk përpiqet për ta ndryshuar këtë realitet./euro/

Rruga Press