Vazhdojnë evakuimet e civilëve nga Ukraina lindore

Evakuimet e civilëve vazhduan të shtunën në pjesët e Ukrainës lindore të shkatërruar nga lufta, një ditë pasi një sulm me raketa shkaktoi vdekjen e të paktën 52 vetëve në një stacion treni ku mijëra njerëz prisnin të largoheshin përpara një sulmi të pritshëm rus.

Zëvendëskryeministrja Iryna Vereshchuk tha se 10 korridore evakuimi ishin planifikuar për të shtunën me shpresën për t’u dhënë mundësi banorëve të largoheshin nga zonat e luftës në rajonet lindore të Donetskut dhe Luhanskut që përbëjnë Donbasin, si dhe Zaporizhian fqinje. Autoritetet ukrainase u kanë bërë thirrje civilëve që të largohen përpara një ofensive të pritshme dhe të intensifikuar nga forcat ruse.

Ministria e Mbrojtjes e Britanisë njoftoi të shtunën se forcat detare ruse po lëshonin raketa për të mbështetur operacionet tokësore në Ukrainën lindore, përfshirë qytetet port të Mikolaivit dhe Mariupolit. Autoritetet ukrainase kanë paralajmëruar se parashikojnë të shohin prova për më shumë vrasje masive pasi të arrijnë në qytetin port jugor të Mariupolit, i cili është gjithashtu në Donbas dhe është goditur nga luftime intensive.

Rruga Press