Lajme

Unioni Turistik i Shqipërisë kundër Paketës Fiskale 2027: Taksa më të larta, goditje konkurrueshmërisë

Unioni Turistik Shqiptar ka kërkuar rishikimin e ndryshimeve të propozuara në Paketën Fiskale 2027, duke paralajmëruar se rritja e TVSH-së për turizmin nga 6% në 10% dhe e tatimit mbi dividendin nga 8% në 15% do të rëndojë sipërmarrjen dhe do të dobësojë konkurrueshmërinë e sektorit me vendet e rajonit.

Në një deklaratë publike, Unioni shprehet se ndryshimet e propozuara “rëndojnë më tej klimën e biznesit, dobësojnë konkurrueshmërinë e ekonomisë shqiptare dhe frenojnë investimet private”.

Organizata argumenton se rritja e TVSH-së duhet të rishqyrtohet, duke theksuar se prej tre vitesh ka kërkuar vendosjen e një norme prej 10% për të gjitha shërbimet turistike, me synimin për të thjeshtuar procedurat dhe për të rritur konkurrueshmërinë.

“Ne, si Union Turistik, kemi kërkuar që para 3 vitesh të kemi një TVSH prej 10% për të gjitha shërbimet që përfshijnë sektorin e turizmit, sepse kjo do ta thjeshtonte procedurën dhe do të na bënte më konkurrues me vendet e tjera të rajonit tonë”, thuhet në deklaratë.

Sipas Unionit, bizneset shqiptare përballen me kushte të ndryshme fiskale krahasuar me destinacionet konkurruese. Greqia aplikon një normë prej 13% për shërbimet turistike, përfshirë hotelet, transportin, ushqimin dhe pijet, ndërsa Maqedonia e Veriut aplikon TVSH prej 5% për akomodimin dhe 10% për shërbimet e tjera turistike.

Lexo më shumë  “Serbia nuk i sanksionon rusët dhe vazhdon linjën nacionaliste ndaj Kosovës”, Martens kërkon distancim nga Beogradi

Ndërkohë, rritja e propozuar do ta vendoste Shqipërinë në të njëjtin nivel me Italinë, e cila ka një normë prej 10% për sektorin, por Unioni e konsideron këtë një destinacion të pakrahasueshëm me Shqipërinë.

Shqetësim tjetër për sektorin është rritja e tatimit mbi dividendin nga 8% në 15%. Sipas Unionit, kjo normë do ta vendoste Shqipërinë mbi Greqinë dhe Kroacinë, ku tatimi mbi dividendin është përkatësisht 5% dhe 10%.

“Prandaj, nuk do të ishte normale që të pretendohet se Shqipëria do të konkurronte me këto vende, të cilat e kanë dividendin sa gjysmën e tatimit që paguajnë bizneset tona”, argumenton organizata.

Unioni Turistik nënvizon gjithashtu se bizneset nuk do të kenë mundësi t’ua kalojnë automatikisht klientëve koston shtesë që mund të krijojë rritja e TVSH-së. Sipas deklaratës, kontratat me operatorët ndërkombëtarë për sezonin turistik 2027 janë nënshkruar dhe çmimet janë përcaktuar disa muaj më parë.

Lexo më shumë  Eurostat “zbulon” paradoksin, shqiptarët rritën të ardhurat në 2025-n, por u bënë më të varfër

Për këtë arsye, organizata kërkon rishikimin e masave që rrisin barrën fiskale, duke vlerësuar ndikimin e tyre të kombinuar mbi investimet, punësimin dhe konkurrueshmërinë. Ajo kërkon gjithashtu hapjen e një procesi konsultimi me organizatat përfaqësuese të biznesit përpara miratimit përfundimtar të paketës, si dhe parashikimin e periudhave tranzitore për ndryshimet që prekin kontratat ekzistuese dhe planet e investimit.

Unioni thekson se nuk është kundër reformës fiskale, por kërkon që ajo të përqendrohet në luftën kundër evazionit, informalitetit dhe konkurrencës së pandershme, si dhe në përmirësimin e administrimit të të ardhurave publike.

“Ne nuk jemi kundër reformës fiskale. Përkundrazi, jemi për një reformë që lufton evazionin, lufton informalitetin dhe konkurrencën e pandershme, përmirëson administrimin e të ardhurave publike dhe garanton drejtësi në taksim, pa dëmtuar zhvillimin ekonomik të vendit”, përfundon deklarata./Monitor.al

Rruga Press

YouTube player