Ukraina: Forcat ruse po vazhdojnë ofensivën në Bahmut

March 11, 2023March 11, 2023 user 1

Forcat ruse po vazhdojnë ofensivën e tyre në zonën përreth qytetit Bahmut të rajonit të Donjeckut, njoftoi ushtria ukrainase më 11 mars.

Ushtria ruse nisi “më shumë se 100 sulme” përgjatë vijës së frontit, duke përfshirë vendet si: Lyman, Bahmut, Avdijivka, dhe Shahtarsk, tha Shtabi i Përgjithshëm i Ukrainës.

Rusia gjithashtu raportohet se kreu 29 sulme ajrore dhe katër sulme raketore në rajonin e Donjeckut gjatë 24 orëve të fundit, tha ushtria, duke shtuar se disa civilë u plagosën dhe infrastruktura civile u dëmtua.

Lexo më shumë Gërvalla: Paqja në Evropë mund të sigurohet vetëm duke ndalur të gjithë së bashku Rusinë dhe Serbinë

Raportimet nuk mund të konfirmoheshin në mënyrë të pavarur.

Sekretari i Përgjithshëm i NATO-s, Jens Stoltenberg, paralajmëroi më 8 mars se qyteti i shkatërruar ukrainas, Bahmut, mund të bjerë në duart e rusëve në ditët në vijim, pasi ky qytet lindor për muaj të tërë po përballet me luftime intensive.

Ministri rus i Mbrojtjes, Sergei Shoigu, ka thënë më 7 mars se kapja e Bahmutit do të ishte hap kyç për nisjen e një ofensive më të gjerë në rajonin e Donjeckut.

Lexo më shumë Studentët belgë e holandezë në protesta, kërkojnë t’i jepet fund luftës në Gaza

Luftimet përreth Bahmutit kanë qenë luftimet më të gjata dhe më të ashprat që kur Rusia nisi pushtimin e Ukrainës më 24 shkurt 2022.

Ekspertët perëndimorë kanë thënë se Bahmuti ka më pak rëndësi strategjike për Rusinë sesa rëndësi simbolike.

Rruga Press