Ukraina e heton si gjenocid zhvendosjen e fëmijëve në Rusi

Prokurorja e Përgjithshme e Ukrainës, Iryna Venediktova, ka deklaruar se po mbikëqyr hetimet e shumta të krimeve të luftës në këtë vend, ku po shqyrtohen edhe akuzat për dëbimin e dhunshëm të fëmijëve për në Rusi, për çka po tentohet të ngrihet padi për gjenocid të mundshëm.

Venediktova ka thënë se ka mbi 20 raste lidhur me transferimin e dhunshëm të njerëzve në Rusi nga rajone të ndryshme të Ukrainës, që nga fillimi i pushtimit më 24 shkurt.

Përqendrimi te largimi i fëmijëve është mënyra më e mirë për të siguruar të dhëna që duhen për të plotësuar kriteret ligjore që definojnë gjenocidin, ka thënë Venediktova në një intervistë për Reuters.

“Që në ditët e para të luftës, ne e nisëm rastin për gjenocidin. Ky transferim me forcë i fëmijëve është shumë i rëndësishëm për ne”, ka thënë ajo.

Venediktova ka shtuar se hetimet për të nisur një rast gjenocidi po synojnë zonat nga veriu i Ukrainës deri në Mykolaiv dhe Kherson në bregun jugor. Por, sipas saj, mbledhja e provave po ndërlikohet nga lufta.

Sipas Konventës së Gjenocidit të vitit 1948, dëbimi me forcë i personave, veçmas transferimi i dhunshëm i fëmijëve gjatë një konflikti përbën krim lufte.

Venediktova nuk tregoi se sa fëmijë dyshohet se janë transferuar me dhunë nga Ukraina në Rusi, por avokatja e popullit të Ukrainës, Lyudmyla Denisova, ka deklaruar në maj se Rusia ka zhvendosur mbi 210,000 fëmijë gjatë kësaj lufte.

Rruga Press