Themelohet Fondi i Sigurisë për Ushtrinë e Kosovës

Fondi i Sigurisë, që ka për qëllim t’i plotësojë nevojat e Forcës së Sigurisë të Kosovës, ka marrë formë.

Këtë e ka njoftuar kryeministri i Kosovës, Albin Kurti, i cili tha se ky fond është në përputhje me nevojat e Forcave të Sigurisë së Kosovës, me situatën aktuale dhe është themeluar pas konsultimeve me partnerët ndërkombëtarë.

Kurti më tej ka thënë se mjetet e mbledhura synojnë që t’i përdorin në përputhje me strategjinë e sigurisë shtetërore të Kosovës, e cila pritet të miratohet nga Qeveria.

Kurti më tej ka ftuar të gjithë qytetarët e Kosovës si dhe bashkatdhetarët, por edhe donatorë të tjerë, që të kontribuojnë për sigurinë shtetërore.

Njoftimi i plotë:

Themeluam Fondin e Sigurisë

Në përputhje me nevojat e Forcave të Sigurisë së Kosovës, situatës aktuale dhe pas konsultimeve me partnerët ndërkombëtarë, kam autorizuar sot Ministrinë e Financave për themelimin e “Fondit të Sigurisë”.

Mjetet e mbledhura financiare synohet të përdoren në përputhje me strategjinë e sigurisë shtetërore të Republikës së Kosovës që pritet të miratohet nga Qeveria e Republikës se Kosovës. Funksionimi i këtij fondi do të rregullohet me akte përkatëse procedurale dhe do të përdoret ekskluzivisht për qëllimin e përcaktuar nga qeveria.

Në përputhje me legjislacionin në fuqi do të zbatohen procedurat për prejardhjen e mjeteve financiare me qëllim të ruajtjes së integritetit të fondit dhe qëllimit të tij.

Ftohen qytetarët e Kosovës dhe bashkatdhetarët tanë në diasporë por edhe donatorë të tjerë të kontribuojnë për sigurinë shtetërore.

Rruga Press