The Guardian/CDC rekomandon vaksinat Pfizer dhe Moderna përpara Johnson & Johnson
Paneli këshillues përmendi rrezikun e rasteve të rralla, por ndonjëherë fatale të mpiksjes së gjakut, si dhe një nivel më të ulët të efektivitetit kundër Covid në vaksinën J&J
Qendrat amerikane për Kontrollin dhe Parandalimin e Sëmundjeve (CDC) rekomanduan të enjten që amerikanët të zgjedhin të marrin një nga dy vaksinat e tjera të autorizuara Covid-19 mbi vaksinën e Johnson & Johnson, për shkak të rasteve të rralla por ndonjëherë fatale të mpiksjes së gjakut.
Sipas The Guardian, vendimi vjen pasi një panel këshilltarësh të jashtëm votuan për të rekomanduar drejtimin e amerikanëve drejt vaksinave mRNA për mbrojtje kundër Covid-19 që do të thotë doza nga Pfizer/BioNTech ose Moderna në SHBA.
Komiteti këshillues i CDC për imunizimin votoi njëzëri për të bërë rekomandimin. Rastet e trombozës me sindromën e trombocitopenisë (TTS), e cila përfshin mpiksjen e gjakut të shoqëruar nga një nivel i ulët i trombociteve, janë raportuar më parë tek marrësit e vaksinës J&J. Normat më të larta të raportimit janë te gratë nën 50 vjeç.
CDC tha se shkalla e incidenteve të tilla është më e lartë se sa ishte vlerësuar më parë, si te femrat ashtu edhe te meshkujt, me të paktën nëntë të vdekur pas incidenteve të tilla të koagulimit të gjakut në SHBA. Anëtarët e panelit thanë gjithashtu se vaksina e J&J është më pak efektive në parandalimin e koronavirusit sesa dy vaksinat e tjera të autorizuara për përdorim në SHBA nga Administrata e Ushqimit dhe Barnave (FDA).