Tetraplegjikët protestë para Kuvendit, kërkojnë më shumë mbështetje financiare
Për t’iu dëgjuar zëri dhe që kërkesat e tyre të realizohen, tetraplegjikët dhe paraplegjikët këtë të enjte protestën e zhvendosën përballë Kuvendit.
Ashtu si fermerët javën e shkuar, kryeministri Rama, pasi doli nga salla plenare doli dhe i takoi vetë protestuesit dhe i dërgoi në një takim me ministret Ibrahimi dhe Manastirliu.
Pasi dolën nga takimi, kreu i Shoqatës së Invalidëve Para-Tetraplegjikë, Bajram Tirana, u shpreh optimist për plotësimin e kërkesave.
“Nga debati që patëm lamë një datë që pasi dy ministritë të bisedojnë të dalin mbi pikat ekonomike që kemi parashtruar. Nuk pretendojmë të realizohen të 7 pikat, të mos harrojnë se kemi një marrëveshje në mes dhe kërkojmë implementim”, u shpreh Bajram Tirana.
Para dhe tetraplegjikët kërkojnë rritje të pagesave për trajtimin e tyre, rikthimin e pagesës për energjinë elektrike, pagën për kujdestarin si dhe shlyerjen e detyrimeve të prapambetura nga qeveria./euronews/