Tani Porti i Durrësit është automatikisht dëm ekonomik

Nga Klodian Tomorri

Doli kryeministri sot dhe tha se portin e ri të Durrësit do ta ndërtojmë me financim të brendshëm nga paratë e buxhetit. Pasi i gënjyen qytetarët publikisht 2 vjet rresht, herë duke u thënë se porti do të ndërtohej me lekët e Pirro Vengut, herë duke shpikur formula hibride financimi me koncesionarë privatë, sot e pranoi dhe vet.

Pranoi se e prishën portin ekzistues që t’i falnin tokën Alabbarit dhe tani do t’i detyrojnë qytetarët të paguajnë 1 miliardë euro për të ndërtuar portin e ri.

Dhe që ta vajisin pak gënjeshtrën që mos t’u duket cullak, herë pas here nxjerrin Pirron nëpër televizione që të thotë: “shiko, në fund fare me fitim jemi në sepse do të marrim 1.2 miliardë euro fitime nga Porti i Alabarit dhe do paguajmë 1 miliardë për të ndërtuar Portin e ri. Pra dalim 200 milionë euro fitim.”

Do t’i marrësh zoti Pirro , do t’i marrësh. Ashtu siç gjete paratë për të ndërtuar portin e ri, ashtu do të marrësh dhe 1.2 miliarde euro fitime tek Alabbari. Ka disa ëndrra që do dhe dalin. Por zakonisht përfundojnë në qafën e patës.

Ndërkohë i madhi nuk harroi as këtë herë që të permende se kemi përfshirë NATO-n në ndërtimin e Portit. Po mirë, merrjani paratë NATO-s, meqe paskemi partnerit të posaçëm strategjik me NATO-n për Portin e Porto Romanos.

Edhe lajmërojini të paktën një ditë me parë ata të Financave kur thoni kështu gjërash publikisht mos ja u lëshoni si bomba të papritura. Se tani nuk dinë ku të plasin kokën për të gjetur lekët që desh i gjeti Pirrua me Belen.

Meqë ra fjala. Ky është automatikisht dëm ekonomik.

Rruga Press