Taksitë pa shofer dalin në rrugët e Kinës

Bota ka vite që synon të prodhojë makinat plotësisht autonome dhe duket se një kompani kineze sapo iu afrua edhe më shumë këtij realiteti.

AutoX, njoftoi se kishte nxjerrë “robot-taksitë”, të cilat qarkullojnë pa shofer në rrugët publike në Shenzhen. Kjo kompani ka hequr plotësisht shoferin rezervë ose çdo operator të largët për flotën e saj lokale prej 25 makinash.

Momentalisht, qeveria nuk kufizon rrugët ku operon AutoX në qytet, megjithëse kompania tha se ata janë përqëndruar në qendrën  e qytetit.

“Kjo është një ëndërr!”, tha CEO i AutoX, Jianxiong Xiao në një intervistë.

“Kemi punuar për shumë vite dhe tani nga pikëpamja teknike, makina është gati”, shtoi ai.

AutoX u themelua në 2016 nga Xiao, një ish-asistent pedagog në Princeton. Firma me qendër në Shenzhen përqendrohet në krijimin e teknologjisë për makina që drejtojnë vetveten, dhe është partnere me prodhues të mëdhenj të automjeteve, të tilla si Fiat Chrysler, për të zhvilluar dhe vendosur “robot-taksin” e saj.

Nisma e re është ende në modalitetin e provës dhe aktualisht nuk është e hapur për publikun. Kjo ka të ngjarë të mos ndryshojë së shpejti, sipas Xiao, i cili tha se shpresonte të merrte leje për të zgjeruar programin për udhëtarët e rregullt në dy ose tre vitet e ardhshme.