Sveçla: Arsenali i ri i armëve qartëson planin e Serbisë për aneksimin e veriut
Ministri i Punëve të Brendshme, Xhelal Sveçla, ka thënë se kapja e arsenalit të ri të armëve në veri, të shtunën gjatë ditës, ka qartësuar planin e Serbisë për aneksimin e veriut të Kosovës përmes agresionit terrorist.
Policia e Kosovës gjatë ditës ka konfirmuar se ka gjetur armë, mjete eksploduese dhe pajisje të tjera ushtarake gjatë bastisjeve të kryera të shtunën në veri, lidhur me ngjarjet e 24 shtatorit në Banjskë. Zëvendësdrejtori i Policisë së Kosovës për rajonin e veriut, Veton Elshani, ka thënë për medit se bastisjet janë kryer në shtatë lokacione të ndryshme në veri.
E ministri Sveçla ka thënë se armët e kapura sot janë prodhime të njëjta me ato të sekuestruara më herët.
“Vijon zbardhja e planit të strukturave terroriste të Serbisë për aneksimin e veriut të vendit tonë. Armatimi i zbuluar sot bën pjesë në arsenalin e Zveçanit dhe Banjskës. Në kuadrin e aktivitetit policor, sot u zhvilluan bastisje në shtatë lokacione në veriun e vendit tonë. Granatahedhës dore, eksplozivë, mina kundër këmbësorisë, mina me sahat e teledirigjim, detonatorë e çanta me pajisje të ndryshme, prodhime të njëjta me ato që u sekuestruan në Banjskë dhe më herët në Zveçan, po qartësojnë për ne dhe për opinionin ndërkombëtar gjerësinë e planit të Serbisë për aneksimin e veriut përmes agresionit terrorist. Ne pandalshëm dhe me energji shtesë do të vazhdojmë deri në çrrënjosjen e terrorizmit kundër Republikës”, ka shkruar ai në Facebook.
Më 24 shtator, si pasojë e një sulmi të armatosur në Banjskë të Zveçanit u vra polici Afrim Bunjaku. Në aksionin e Policisë, dhjetëra sulmues të armatosur e uniformuar serbë u rrethuan në fshatin Banjskë. Policia u sulmua në vazhdimësi nga sulmuesit. Nga aksioni tre sulmues u vranë. Është kapur edhe arsenal i madh armësh. Përgjegjësinë për organizimin e grupit të armatosur e pati marrë Milan Radoiçiq, ish-nënkryetar i Listës Serbe, partisë më të madhe të serbëve të Kosovës. Ai u lirua nga Gjykata e Lartë e Serbisë, një ditë pasi u ndalua nën dyshimet se ka kryer një sërë veprash – përfshirë trafikim armësh dhe krime kundër sigurisë së përgjithshme. Gjykata ia ndaloi daljen nga Serbia dhe e obligoi të paraqitet në stacionin kompetent policor dy herë në muaj.
Rruga Press