Sulmi në Banjskë, Gjykata e Prishtinës lë në paraburgim 3 të akuzuarit

Gjykata Themelore në Prishtinë ka marrë vendim që tre të akuzuarve për sulmin në Banjskë t’ua vazhdojë masën e paraburgimit edhe për dy muaj të tjerë.

Në njoftimin e Themelores, thuhet se të pandehurit do të mbahen në paraburgim deri më 24 shkurt të 2024-s.

“Referuar kërkesës tuaj për informata, ju njoftojmë se pas kërkesës së Prokurorisë Speciale të Republikës së Kosovës për vazhdimin e masës së paraburgimit në çështjen penale kundër të pandehurve D.M, B.S dhe V.T, Gjykata Themelore në Prishtinë – Departamenti Special ka aprovuar kërkesën e PSRK-së dhe tre të pandehurve iu ka vazhduar masën e paraburgimit në kohëzgjatje prej dy muaj, për secilin. Masa e paraburgimit të pandehurve iu është vazhduar nga data 24.12.2023 deri me datë 24.02.2024”, thuhet në njoftimin për KOHËN nga zëdhënësja e kësaj gjykate, Mirlinda Gashi.

Në tetorin e sivjetmë, Gjykata Themelore ua kishte vazhduar masën e paraburgimit tre të dyshuarve. Ata gjenden në paraburgim që nga shtatori.

Të pandehurit dyshohet se me një grup personash, në mënyrë të organizuar dhe të armatosur, pasi janë futur ilegalisht e të armatosur në Kosovë, me qëllim të vënies në pritë të zyrtarëve të Policisë së Kosovës e nëpërmjet bllokimit të rrugëve, kanë sulmuar me granata dhe armë të tjera.

Nga sulmi në Banjskë të Zveçanit kishte mbetur i vrarë rreshteri Afrim Bunjaku.

Rruga Press