Socialistët dirigjojnë seancën për 8 minuta, ashpërsojnë masat për opozitën! Mazhoranca voton ligjet mes kaosit, 5 javë pa transparencë
Njëjtë si kryeministri, edhe socialistët kanë dirigjuar seancën e kësaj të enjteje duke mos dalë nga skenari i votimit në 8 minuta. Teksa kemi hyrë në javën e pestë të gjendjes së jashtëzakonshme në Kuvendin e Shqipërisë, mazhoranca ka vepruar njëlloj si në seancat e mëparshme duke shkuar në seancë vetëm për të ngritur kartonin.
Edhe opozita ka vijuar kaosin brenda dhe jashtë parlamentit, madje ka pasur edhe përplasje fizike me gardistët, megjithatë asnjë nga socialistët nuk e prishi terezinë dhe shkuan me shpejtësi për të votuar projektligjet, pasi siç dihet kanë shumicën e deputetëve në Parlament.
Situata vijon të jetë shumë e tensionuar në Parlament, kjo pasi po evidentohet gjithnjë e më tepër mungesa e transparencës nga ana e mazhorancës për qytetarët dhe pafuqia e opozitës për t’i bërë ballë këtij sundimi nga partia shtet.
Socialistët nxituan për të miratuar mes kaosit dhe tensioneve rregulloren e re për përjashtimin e me 30 deri në 60 ditë të deputetëve që prishin seancat plenare.
Pasi zgjati vetëm disa minuta, Nikolla, teksa miratoi nen për nen këtë rregullore dhe rendin e ditës, deklaroi mbylljen e seancës. Rregullorja e re e Kuvendit u miratua me 74 vota pro. Ndërkohë, deputetët e opozitës vijuan protestën e tyre, me rënie të tavolinave dhe thirrjet; turp, turp!”.
Sakaq, në sallë u hodhën edhe tymuese, ashtu si në seancat e kaluara, ndërsa disa deputetë opozitarë nuk u lejuan që të futeshin në Kuvend.
Deputetët e përjashtuar
Gazment Bardhi
Sali Berisha
Flamur Noka
Edi Paloka
Albana Vokshi
Elda Hoti
Ervin Salianji
Bledion Nallbati
Asllan Dogjani
Lefter Gështenja
Isuf Çelaj
Luan Baçi
Xhelal Mziu
Prej pothuajse 5 javësh, Kuvendi është kthyer në hapësirë votimi të lirë të deputetëve të mazhorancës e ndërsa në arenë proteste për ata të opozitës. Socialistët kanë shfrytëzuar revoltën e opozitës për të miratuar me shpejtësi dhe pa u ndjerë projektligjet duke mos gjetur një zgjidhje për të vijuar me një seancë normale. Nga ana tjetër, qytetarët ndjekin me kërshëri këtë spektakël dy palësh të politikës vendase krejtësisht të painformuar se çfarë ligjesh votohen në parlament. Në këtë periudhë ku opozita kërkon të ngrihen 3 komisione Hetimore, socialistët kanë bërë transparent vetëm kartonët jeshilë për qytetarët. Gjatë muajit nëntor, janë zhvilluar 4 seanca, më e gjata prej tyre ishte 22 minuta. Në mandatin e tretë, socialistët nuk i shqetëson fakti se ligjet po kalojnë në një situatë kaotike ku askush nuk merr vesh asgjë.