Shqipëria 140 mijë më pak të punësuar në bujqësi në dy vitet e fundit, thotë eksperti

“Në dy vitet e fundit, të punësuarit në sektorin e bujqësisë, kanë pësuar një ulje nga 200 mijë në 60 mijë”. Kështu deklaroi Kujtim Hoxha, eksperti i sigurimeve shoqërore për emisionin “Mirëmëngjes” në Euronews Albania.

Ai nënvizoi se gjatë këtyre viteve ka pasur edhe një ulje të kontribuuesve dhe kjo ka ndikuar në skemën e pensioneve.

“Raporti mes kontribuues-përfitues për pensionet ka qenë 5 me 1. Aktualisht është 1 me 1.1”, tha ai.

Z. Hoxha tregoi se një grua del në pension në moshën 61 vjet e 4 muaj dhe do të vazhdojë kështu deri sa të mbushë moshën 65 vjeç.

“Do të rritet edhe për meshkujt nga dy muaj dhe 2 dy muaj derisa të plotësohet mosha 67 vjeç”, tha ai.

Ndërsa, ekspertja e ekonomisë, Irena Xhani tha se në të ardhmen do të kemi një rritje të numrit të pensionistëve dhe ulje të kontribuuesve.

Znj. Xhani shtoi se duhet të ndërhyhet për të ndryshuar skemën e pensioneve për të ardhmen, pasi deri më tani janë bërë vetëm arnime./euronews.al/

Rruga Press