Shkëputen bovat në portin e Durrësit, Shërbimi Hidrografik me njoftim të rëndësishëm për lundërtarët

Moti i keq ka shkaktuar probleme edhe në portin më të madh në vendin tonë.

Autoriteti Portual Durrës njoftoi mbrëmjen e djeshme se do të kishte vonesa në nisjen e një prej trageteve të linjës Durrës-Bari, si pasojë e motit të keq.

Trageti “Rigel VII”, parashikuar për t’u nisur për lundrim drejt Barit në orën 03:00, u nis me rreth 1 orë vonesë, ndërsa la portin e Durrësit rreth orës 04:00 të mëngjesit të kësaj të marte.

Gjithashtu, Shërbimi Hidrografik ka njoftuar lundërtarët që të tregojnë kujdes të shtuar gjatë lundrimit në kepin e Selitës dhe në hyrje të kanalit të portit Durrës pasi në det ka prani objektesh të ngurta pluskuese.

Në një njoftim në faqen zyrtare, ai bën me dije se po punohet për riparimin e defektit të shkaktuar nga moti i keq.

“Njoftim për Lundërtarët!

Ju informojmë se për shkak të motit të keq janë shkëputur bova kardinale perëndimore e cekinës të Talbotit (në VL të Kepit të Selitës), si dhe bova e ujrave të lira (bova e pilotit) në hyrje të kanalit të portit Durrës.

Lundërtarët të tregojnë kujdes të shtuar gjatë lundrimit në këto zona, si dhe për praninë e objekteve të ngurta pluskuese që mund të ndodhen në det si pasojë e prurjeve të mëdha nga lumenjtë.

Shërbimi Hidrografik po punon për vendosjen e bovave në gatishmëri sa më shpejt.

Ju faleminderit për mirëkuptimin!”

Rruga Press