SHBA-ja shpreson ta “shpëtojë” Bosnjën pas kërcënimeve të serbëve
Shtetet e Bashkuara të Amerikës janë të vendosura ta largojnë Bosnjën “nga shkëmbi” mes kërcënimeve nga nacionalistët serbë dhe po shqyrton sanksionet mes opsioneve të tjera, ka thënë një zyrtar i lartë i Departamentit të Shtetit.
Derek Chollet, një këshilltar i lartë i sekretarit të shtetit Antony Blinken, ka folur përpara një takimi të premten të asamblesë serbe të Bosnjës, e cila pritet të votojë nëse do të fillojë procesi i tërheqjes nga ushtria boshnjake, gjyqësori dhe sistemi i taksave.
Hapat e tillë, të kërkuar nga lideri nacionalist Milorad Dodik, do të përfaqësonin një hap thelbësor drejt shkëputjes. Ka të ngjarë të ketë një vonesë gjashtëmujore përpara se vendimet e asamblesë të hyjnë në fuqi, por një votim mund të fillojë një kthim të mundshëm në konflikt.
Chollet, vizitoi Bosnjën muajin e kaluar si pjesë e një ofensive diplomatike nga administrata e Bidenit për të trajtuar problemet dhe kërcënimet e gjata të ashpra nga Dodik për të rindërtuar një forcë të armatosur serbe.
“Ne jemi përpjekur me të vërtetë të përshpejtojmë disa nga përpjekjet tona diplomatike në përpjekje për ta larguar këtë nga maja e shkëmbit”, tha Chollet për Guardian. “Është e dukshme që kemi mbushur 26 vjet që nga nënshkrimi i marrëveshjes së paqes të Dejtonit dhe po flitet për rikthim të mundshëm të konfliktit ose një krizë të madhe me Bosnje-Hercegovinën, gjë që është thellësisht shqetësuese për ne”.
Gjatë luftës, ushtria serbe e Bosnjës kreu spastrim të gjerë etnik, një rrethim gati katërvjeçar të Sarajevës dhe shkatërrimin e “strehës së sigurt” të OKB-së të Srebrenicës. Rreth 100,000 njerëz u vranë në konflikt.
Chollet tha se ai u kishte dorëzuar një letër nga Blinken udhëheqësve të Bosnjës, duke theksuar se paqja në Bosnje ishte një prioritet për administratën.
Tema e dytë e letrës së Blinkenit ishte kërcënimi me sanksione kundër liderëve politikë që kërcënojnë paqen pas Dejtonit. Dodik, targeti kryesor i këtij kërcënimi, ka deklaruar se ai nuk “ia ndjen” për sanksionet, por Chollet beson se ato mund të kenë një ndikim.
Gjatë administratës Trump, si SHBA-ja ashtu edhe BE-ja hodhën idenë e shkëmbimeve të tokës në baza etnike që përfshin territorin në Bosnje dhe në Kosovë si një mjet për zgjidhjen e problemeve rajonale, megjithatë Chollet këmbënguli se “kjo nuk është fare ajo ku jemi fokusuar”.
Rruga Press