SHBA-ja kërkon hetim të plotë për vrasjen e gazetares së Al Jazeeras nga forcat izraelite

Ambasadori i Shteteve të Bashkuara të Amerikës në Izrael, Tom Nides, ka kërkuar hetim të plotë dhe të pavarur për vrasjen e gazetares së Al Jazeeras, Shireen Abu Akleh. Ajo vdiq pasi u qëllua nga forcat izraelite të mërkurën.

Abu Akleh u vra derisa raportonte për bastisjet izraelite në Jenin, në Bregun Perëndimor, sipas autoriteteve palestineze dhe dëshmitarëve, ndërsa një tjetër gazetar, Ali al-Samoudi, u plagos nga një plumb në shpinë dhe gjendja e tij mbetet stabile, raportoi Al Jazeera.

Nides është zyrtari i parë amerikan që u deklarua rreth vrasjes së Abu Aklehit , duke thënë se ishte i trishtuar kur mësoi për vdekjen e saj.

“Unë inkurajoj një hetim të plotë mbi rrethanat e vdekjes së saj dhe plagosjes së të paktën një gazetari tjetër në Jenin”, ka thënë ai.

Disa orë më vonë, zëdhënësi i Departamentit të Shtetit të SHBA-së, Ned Price, dënoi vrasjen, duke thënë se përgjegjësit “duhet të mbajnë përgjegjësi”.

“Vdekja e saj është një fyerje për lirinë e medias kudo”, ka deklaruar ai.

Autoritetet palestineze kanë refuzuar ofertën izraelite për të kryer një hetim të përbashkët.

Duke folur me gazetarët të mërkurën, ambasadorja e SHBA-së në Kombet e Bashkuara, Linda Thomas-Greenfield, e quajti vrasjen ngjarje të tmerrshme dhe tha se është i nevojshëm hetimi transparent.

Al Jazeera ka fajësuar Izraelin për vrasjen. Në një komunikatë, i ka bërë thirrje komunitetit ndërkombëtar që të dënojë dhe të mbajë përgjegjëse forcat izraelite për “shënjestrim dhe vrasje të qëllimshme” të koleges, Shireen Abu Akleh.

Rruga Press