SHBA-ja – Iranit: S’ka marrëveshje bërthamore për sa kohë i vritni qytetarët dhe i shisni dronë Rusisë

Marrëveshja bërthamore me Iranin nuk është e mundur për sa kohë që Teherani vret qytetarët e vet dhe i shet dronë të armatosur Rusisë, u tha gazetarëve në Uashington koordinatori i Komunikimeve Strategjike të Këshillit të Sigurisë Kombëtare të SHBA-së, John Kirby, shkruan CNN.

“Ne thjesht nuk shohim një marrëveshje së shpejti, ndërsa Irani vazhdon të vrasë qytetarët e vet dhe t’i shesë dronë Rusisë”, ka thënë Kirby.

“Ajo në të cilën jemi fokusuar tani janë mënyra praktike për t’u përballur me Iranin në ato zona, jo në marrëveshjen me Iranin”, shtoi ai.

Zëdhënësi i Departamentit të Shtetit të SHBA-së, Ned Price, ka thënë se marrëveshja bërthamore (JCPOA) ka qenë jashtë agjendës për disa kohë.

“Ky është sigurisht rasti, që iranianët vranë mundësinë për një kthim të shpejtë në respektin e ndërsjellë për JCPOA”, theksoi Price.

Ai shtoi se administrata e presidentit Joe Biden është e përkushtuar të sigurojë që Irani të mos posedojë kurrë armë bërthamore.

Ai beson se diplomacia është mënyra më e mirë për ta parandaluar këtë.

“Ne kemi një paketë të gjerë mjetesh dhe nuk kemi hequr asnjë opsion nga tavolina”, ka thënë ai.

Rruga Press