ShBA-ja e Irani arrijnë një marrëveshje paraprake për hapjen e Hormuzit dhe bisedimet bërthamore

Një marrëveshje paraprake është arritur në bisedimet mes Shteteve të Bashkuara dhe Iranit, thanë zyrtarë amerikanë të enjten, megjithëse presidenti Donald Trump ende nuk e ka miratuar atë dhe situata në rajon mbetet e tensionuar, raportoi CNN. 

Miratimi i Trumpit do të jetë vendimtar për çdo marrëveshje, paralajmëruan zyrtarët, ndërsa presidenti kishte deklaruar një ditë më parë se nuk ishte i kënaqur me gjendjen aktuale të bisedimeve. Po ashtu, nuk ishte e qartë nëse udhëheqësi suprem i Iranit e kishte dhënë miratimin e tij, një tjetër hap i domosdoshëm drejt përfundimit të konfliktit.

Megjithatë, finalizimi i tekstit mes dy vendeve ishte një shenjë se diplomacia po vazhdon, pavarësisht përplasjeve aktive mes ShBA-së dhe Iranit gjatë 48 orëve të fundit.

Memorandumi i Mirëkuptimit do të përfshinte dispozita për heqjen e kufizimeve në Ngushticën e Hormuzit, duke përfshirë lundrim të pakufizuar për anijet dhe heqjen e bllokadës amerikane.

Ai do të nisë një periudhë negociuese 60-ditore për të trajtuar programin bërthamor të Iranit, përfshirë fatin e rezervave të uraniumit të pasuruar në nivel të lartë. Burimet thanë se çështjet më të vështira lidhur me programin bërthamor iranian ende duhet të zgjidhen gjatë këtyre negociatave.

Trumpi më parë është shfaqur optimist për arritjen e një marrëveshjeje me Iranin, por më pas ka ndryshuar qëndrim.

Burime amerikane paralajmëruan se çdo përparim në bisedime mund të zhbëhet shpejt nëse Trump vendos të mos e japë miratimin e tij.

Ai është përballur me presion nga anëtarë të partisë së tij, si dhe nga kryeministri izraelit Benjamin Netanyahu, që të mos pranojë një marrëveshje që do të lehtësonte presionin ndaj Iranit.

Trump ka kërkuar këshilla për të siguruar që marrëveshja të jetë mjaftueshëm e fortë, tha një person i njohur me çështjen. Ai është fokusuar veçanërisht që marrëveshja të mund të paraqitet si më e fuqishme sesa marrëveshja bërthamore e vitit 2015 e arritur në kohën e Barack Obamës, nga e cila ai vetë u tërhoq më vonë.

Rruga Press