Serbia nuk dënon sulmin ndaj Policisë së Kosovës, e quan spekulativ

Beogradi zyrtar nuk i është përgjigjur thirrjes së kryeministrit Albin Kurti për ta dënuar sulmin në veri ndaj Policisë së Kosovës. Shefi i Zyrës për Kosovë në Qeverinë e Serbisë, Petar Petkoviq, e ka kualifikuar spekulativ sulmin.

Ka bërë thirrje për përmbajtje në ato që i ka cilësuar si spekulime të papërgjegjshme dhe të paqëndrueshme rreth ngjarjeve në Zubin-Potok, të cilat ka theksuar se mund ta minojnë stabilitetin në terren.

Në një postim në Twitter, Petkoviq ka shkruar se “sulmet e orkestruara ndaj serbëve dhe Beogradit zyrtar, para përfundimit të hetimeve, e vënë në pikëpyetje motivin e ngjarjeve”.

Të premten, ministri i Punëve të Brendshme njoftoi se katër sulme me shpërthyes gomash, gurë e me breshëri plumbash dhe granata i ka pësuar në veri të vendit Policia e Kosovës gjatë tri ditëve të fundit. Ministri Xhelal Sveçla e ka kualifikuar akt terrorist sulmin më të fundit me kallashnikov e granata dore. Për këtë, ai e ka fajësuar Serbinë dhe strukturat kriminale të kontrabandës në veri. E drejtori i policisë, Samedin Mehmeti, ka deklaruar se sulmet ishin të koordinuara nga strukturat që i frikësohen ndaljes së aktivitetit të tyre kriminal. Kryeministri Albin Kurti kërkoi nga Serbia që të distancohet dhe t’i dënojë sulmet.

Rruga Press