Serbia kërcënon Kosovën me luftë?

Drejtori i të ashtuquajturës Zyra për Kosovën në Qeverinë e Serbisë, Petar Petkoviq, ka vazhduar të insistojë se implementimi i vendimeve të mara nga Qeveria e Kosovës për reciprocitet në letërnjoftime dhe për kthim të targave ilegale serbe në ato RKS, është shpallje e luftës.

Ai ka kërkuar nga bashkësia ndërkombëtare, siç ka thënë, të ndalë kryeministrin Kurti dhe të bëjë presion tek ai që të themelohet Asociacioni i komunave me shumicë serbe.

Në mbledhjen e javës së shkuar, Qeveria Kurti vendosi që aplikojë të njëjtën masë, në mënyrë reciproke sikurse Beogradi zyrtar, që nuk pranon letërnjoftimin, por në hyrje qytetarët shqiptarë të Kosovës i pajis me një letër që zëvendëson dokumentet e identifikimit.

Poashtu, Qeveria e Kosovës vendosi t’u japë një afat 2-mujor, të fundit, të gjithë atyre që kanë targa ilegale serbe në emër të qyteteve të Kosovës, që t’i ndërrojnë ato në RKS.

Rruga Press