Sekretari i OKB-së dënon sulmet në Mali, Guterres: Shkelje serioze e të drejtave të njeriut

Sekretari i Përgjithshëm i OKB-së, Antonio Guterres dënoi ashpër sulmet e fundit ndaj civilëve në veri të Malit pranë kufirit me Nigerin, në të cilat më shumë se 50 civilë u vranë dhe disa u plagosën.

“Misioni shumëdimensional i OKB -së në Mali është i gatshëm të ndihmojë autoritetet e Malit në sjelljen e autorëve të këtyre krimeve para drejtësisë. Këto sulme të qëllimshme kundër popullatës civile përbëjnë shkelje serioze të ligjit ndërkombëtar për të drejtat e njeriut dhe të drejtës ndërkombëtare humanitare,” tha Guterres në një deklaratë.

Sipas mediave të huaja, ai shprehu ngushëllimet e tij të sinqerta për familjet e viktimave dhe u uroi shërim të shpejtë të plagosurve. Ai shtoi se OKB-ja dërgoi paqeruajtës në zonën e prekur për të mbrojtur civilët dhe ka rritur patrullimin e tij ditën dhe natën për të penguar çdo sulm të mëtejshëm dhe për të lehtësuar ofrimin e shërbimeve bazë në koordinim me Forcat e Mbrojtjes dhe Sigurisë Maliane.

Mali është duke luftuar me një kryengritje të lidhur me Al-Kaedën dhe grupin e Shtetit Islamik që nga viti 2012, kur trazirat filluan në veri të vendit të Afrikës Perëndimore. Dhuna, e cila ka vrarë mijëra civilë dhe trupa, është përhapur që atëherë në Niger dhe Burkina Fason fqinje.

Rruga Press