Samiti i G20 në Romë, ndryshimet klimatike dhe Covid në krye të axhendës

ITALI– Ndryshimet klimatike dhe pandemia e koronavirusit janë në krye të axhendës së Samitit të G20 I cili do të mbahet sot dhe nesër në Romë.

Sipas BBC, është hera e parë që liderët e G20 takohen ballë për ballë që nga fillimi i pandemisë. Megjithatë, Xi Jinping i Kinës dhe Vladimir Putin i Rusisë nuk do të jenë në Romë për samitin, duke zgjedhur në vend të kësaj të paraqiten përmes lidhjes video.

Takimi vjen mes paralajmërimeve gjithnjë e më të shoeshta për të ardhmen nëse nuk ndërmerren veprime urgjente për të ulur emetimet. Grupi i përbërë nga 19 vende dhe Bashkimi Evropian, vlerësohet të jetë përgjegjës për 80% të emetimeve në botë.

Duke folur përpara samitit dyditor, kryeministri i Mbretërisë së Bashkuar, Boris Johnson sugjeroi se dështimi për të vepruar do të rezultojë në kthimin e “qytetërimit tonë” prapa, duke i lënë gjeneratat e ardhshme “në një jetë që është shumë më pak e këndshme se e jona.”

Më shumë se gjashtë miliardë doza të vaksinës Covid janë administruar në mbarë botën, megjithatë, një letër drejtuar kryeministrit italian Mario Draghi, i cili po pret G20, nga më shumë se 160 ish-liderë botërorë dhe figura globale, theksoi se vetëm 2% e njerëzve në vendet me të ardhura të ulëta kanë marrë një dozë.

Ndërkohë, presidenti i SHBA Joe Biden do të bëjë presion që vendet të rrisin prodhimin e energjisë, mes çmimeve të larta, si dhe diskutimit të një plani për të parandaluar pandemitë e ardhshme. Grupi pritet gjithashtu të mbështesë një normë minimale globale tatimore të korporatës prej të paktën 15%, e cila mbështetet nga 140 vende në mbarë botën.

Rruga Press