Rritet në 21 numri i viktimave nga sulmi rus në Kiev, mbi 130 të plagosur

Autoritetet ukrainase njoftuan se numri i viktimave nga sulmi i rëndë ajror rus në Kiev është rritur në 21, ndërsa mbi 130 persona kanë mbetur të plagosur.

Sipas Shërbimit Shtetëror të Emergjencave të Ukrainës, 16 trupa janë nxjerrë nga rrënojat e një ndërtese nëntëkatëshe në qarkun Solomianski të kryeqytetit.

Sulmi, i konsideruar si një nga më të rëndët në tre vitet e luftës, u zhvillua të martën, kur Rusia lëshoi dhjetëra dronë dhe raketa drejt Kievit dhe rajoneve të tjera.

Presidenti ukrainas Volodymyr Zelensky e cilësoi ofensivën si “një prej sulmeve më të tmerrshme ndaj kryeqytetit” dhe tha se në mbarë vendin janë lëshuar 440 dronë dhe 32 raketa.

Ai i bëri thirrje komunitetit ndërkombëtar që “të mos mbyllë sytë” përballë këtyre sulmeve, duke kërkuar mbështetje të mëtejshme për mbrojtjen e Ukrainës.

Rruga Press