Rrëzohet një avion F-35 i Britanisë në Detin Mesdhe
Një avion britanik F-35 u rrëzua në Detin Mesdhe rreth orës 10:00 (GMT), ndërsa piloti ka arritur të katapultohet i sigurt, njoftuan autoritetet britanike.
“Një pilot britanik i avionit F-35 nga HMS Queen Elizabeth u katapultua gjatë operacioneve rutinë të fluturimit në Mesdhe këtë mëngjes”, tha Ministria e Mbrojtjes e Britanisë në një deklaratë.
“Piloti është kthyer në mënyrë të sigurt në anije dhe një hetim ka filluar, kështu që do të ishte e papërshtatshme të komentohej më tej në këtë moment”, thuhet në deklaratë.
HMS Queen Elizabeth është aeroplanmbajtësja kryesore e Mbretërisë së Bashkuar dhe aktualisht është në rrugën e kthimit në Britani nga udhëtimi i saj i parë në Lindjen e Largët.
Ajo mbart tetë avionë britanikë F-35, si dhe dhjetë F-35 amerikanë. Një F-35 vlerësohet të kushtojë rreth 100 milionë funte.
Një hetim ushtarak do të nisë për incidentin që ndodhi në ujërat ndërkombëtare.
