Rrëzohet bombarduesi rus, humb jetën piloti

Një bombardues i ushtrisë ruse është rrëzuar dhe ka shpërthyer në afërsi të një fshati në Siberi.

Aeroplani luftarak 60 milionë dollarësh, u rrëzua në tokë në Irkutsk në rajonin e Siberisë.

Rrëzimi ndodhi në afërsi të një fshati të vogël të quajtur Buret, duke shkaktuar ndërprerje të energjisë elektrike në rajon, ku u përfshi nga zjarri dhe tymi i zi që dilte nga rrënojat e aeroplanit.

Pamjet amatore të regjistruar para rrëzimit shfaqin bombarduesin Tu-22M3 duke fluturuar në qiell në një lartësi të vogël në Siberi.

Pak sekonda më vonë, tregohen pasojat e incidentit – ku zjarri i madh i ndezur vërehej nga distanca të mëdha.

Sipas mediave të atjeshme, katër anëtarë të ekuipazhit që gjendeshin në aeroplan janë katapultuar, derisa piloti ka humbur jetën.

Në video shihet njëri nga të mbijetuarit që akoma kishte helmetën në kokë, kurse guvernatori rajonal i Irkutskut, Igor Kobzev tha se piloti bëri gjithçka që fluturakja të mos binte në zonën e banuar.

Rruga Press