Realizohet edhe një tjetër premtim/ Qeveria e Kosovës prezanton skemën “një i punësuar për çdo familje në nevojë”

Ministri i Financave, Hekuran Murati, njoftoi të hënën se me qëllim që të rritet numri i të punësuarve , është marrë vendim mbështetja e bizneseve që punësojnë anëtarët e familjeve në nevojë.

Ai, në një konferencë për media, tha se është iniciuar skema “Qeveria për Familjet”, synim i së cilës sipas tij, janë familjet në nevojë, duke ua mundësuar atyre që ta kenë të paktën një anëtar të punësuar.

“Bizneseve do t’iu subvencionohet deri në 70% e pagës bruto (maksimumi 300 euro) për gjashtë muaj me radhë. Agjencia e Punësimit të Republikës së Kosovës ofron listën e personave tek bizneset/entitetet të cilët pastaj përzgjedhin personin që do t’i angazhojë bazuar në nevojat dhe profilet e kërkuara”, tha Murati.

Ai tha se në rast se një kompani i ka 10 punëtorë, nëpërmjet kësaj mase mund t’i punësojë 3 punëtorë, që duhet të jenë të regjistruar në Agjencinë e Punës.

“Punëkërkuesit për të përfituar për këtë masë duhet të jenë mbi 18 vjeç e të mos kenë të punësuar dikë në familje”, shtoi ai.

“Si qeveri kemi garuar me dy shtylla kryesore: për punë dhe drejtësi. Siç e ka prezantuar edhe kryeministri, gjatë javës kishim shumë projektligje, kemi një masë të re e që është punësimi. Nuk është se ka qenë e lehtë gjatë dy viteve të fundit pasi kemi pasur kriza vazhdimisht, kishim pandeminë, energjinë, e tani kemi rritjen e çmimeve. Si qeveri jemi munduar të marrim masa, kemi pasur pakon e ringjalljes ekonomike. Kemi dorëzuar në Kuvend edhe ligjin e pagës minimale e në rast të kalimit do të mundësojë rritjen e pagës minimale pas 11 vitesh”, tha Murati.

Ai theksoi se masa për punësim do të zgjasë aq sa është e nevojshme për familjet me asistencë sociale.

“Jemi të gatshëm që t’i mbulojmë të gjitha këto familje. Çështja tjetër me masa të tjera siç e keni pa një vendim per naftën tashme ka efekt”, theksoi ai.

Në vitin 2019, Kryetari i Lëvizjes Vetëvendosje dhe kryeministri i Kosovës, Albin Kurti ishte shprehur se kudo në Kosovë pas 6 tetorit do të thyhej krimi, papunësia dhe varfëria.

Kurti premtoi se në kuadër të skemës sociale do të punësohej nga një anëtarë për çdo familje, premtim që erdhi në kuadër të programit të subjektit ku ai është kryetar, Lëvizjes Vetëvendosje.

Rruga Press